• Yaratildi: 27.02.2025
• Yangilandi: 27.02.2025
• O'qildi: 15

Deputatlar kombinat korxonalari faoliyati bilan yaqindan tanishdi

Oldin xabar berganimizdek, O‘zbekiston Respublikasi Oliy Majlisi Qonunchilik palatasi deputatlari tomonidan Navoiy kon-metallurgiya kombinati faoliyatining ijobiy tajribasi o‘rganildi.

27-fevral kuni deputatlar dunyoga mashhur “Muruntov” koni faoliyati, jumladan, ishlab chiqarish jarayonlari, maʼdan qazish va tashish ishlari, zamonaviy kon texnikalari bilan yaqindan tanishib, mutaxassislar bilan muloqot qilishdi.

Qonunchilik palatasi deputati, Ekologiya va atrof muhitni muhofaza qilish masalalari qo‘mitasi aʼzosi Qizilgul Qosimova taʼkidlaganidek:

“Bu kon haqida ko‘p eshitganman, lekin birinchi kelishim. Haqiqatda, yuqori ishlab chiqarish surʼati va zaxirasiga ega, xalqaro reytinglarda yuqori o‘rinlarni egallab kelayotgan yirik kon ekan. Soha fidoiylari bilan suhbatlashib, mashaqqatli va qizg‘in ish jarayoni, sharafli kasb egalarining o‘z ishiga bo‘lgan munosabatiga guvoh bo‘ldik. Ayniqsa, kombinatda bugun konchilik sohasida o‘rganadigan ijobiy jihatlar ko‘p ekani bizni mamnun etdi.”

Shuningdek, Qonunchilik palatasi deputatlari 2-gidrometallurgiya zavodidagi Ishlab chiqarishning raqamlashtirilgan yagona boshqaruv markazi misolida kombinatda raqamlashtirish, texnologik jarayonlarni avtomatlashtirish yo‘nalishidagi ishlar bilan yaqindan tanishdi.

Qonunchilik palatasi deputati, Ekologiya va atrof muhitni muhofaza qilish qo‘mitasi aʼzosi Odiljon Mamadaliyev:

“Bugun kombinatda har bir soha va yo‘nalishda ijobiy tajribalar, o‘rnak olishga arzigulik jihatlar ko‘p ekan. Jamoa bugun raqamlashtirish borasida ancha ilgarilab ketganiga guvoh bo‘ldik. Yaʼni, ishlab chiqarish kombinat yosh dasturchilari tomonidan yaratilgan loyihalar asosida to‘liq raqamlashtirilgani eng katta yutuqlardan biridir, albatta. Misol uchun, biz borib ko‘rgan raqamlashtirilgan yagona boshqaruv markazida Markaziy kon boshqarmasi ishlab chiqarish korxonalari, texnika va texnologiyalarini muntazam kuzatib borish imkoniyati yaratilgani va ish jarayonlari yangi tizim orqali boshqarilayotgani buning yaqol isbotidir. Bu, shak-shubhasiz, ish unumdorligini oshirish, ishlab chiqarish quvvatlarini kengaytirish, suv va energiya resurslaridan tejamli foydalanish va boshqa qulayliklarni yaratayotganiga o‘rganishlar davomida to‘la amin bo‘ldik.”

Deputatlar kunning ikkinchi yarimida 7-gidrometallurgiya zavodi faoliyati, ishlab chiqarish jarayoni, jumladan, texnogen chiqindilarni qayta ishlash, zamonaviy texnologiyalarni boshqarish bilan yaqindan tanishib, mutaxassislar bilan muloqot qilishdi. 

Qonunchilik palatasi deputati, Tadbirkorlik, raqobatni rivojlantirish va sanoat masalalari qo‘mitasi aʼzosi Farhod Zayniyev taʼkidlaganidek:

“Bu zavod to‘liq chetdan hech qanday ko‘maksiz kombinat quruvchilari, malakali mutaxassis va muhandis-texnologlari tomonidan barpo etilgan ekan. Quvonarli jihati, korxona boshqa zavodlardan texnogen chiqindilarni qayta ishlashi, zamonaviy texnologiyalari bilan ajralib turarkan. Ayniqsa, jamoa asosan yoshlar, mahalliy kadrlardan tarkib topgani, har biri sohaviy bilimlarni puxta egallagan, kasbga doir ko‘nikmalarni chuqur o‘zlashtirgan, kreativ fikrlaydigan, yaratuvchan va intiluvchan mutaxassislar ekani va zamonaviy texnologiyalarni mahorat bilan boshqarayotgani va boshqa yutuqlarini ko‘rib, ularga havasimiz keldi. Demakki, bugun yurtimiz kon-metallurgiya sanoati ishonchli qo‘llarda ekaniga yana bir bor amin bo‘ldik!”

Shu bilan, deputatlar kombinat ijobiy tajribasi va Markaziy kon boshqarmasi bo‘linmalari faoliyatini o‘rganish ishlarini yakunladi.

“NKMK” AJ Matbuot xizmati