• Yaratildi: 08.02.2025
• Yangilandi: 08.02.2025
• O'qildi: 18

Buyuk mutafakkir Alisher Navoiyga ehtirom

Bu yil buyuk mutafakkir, so‘z mulkining sultoni Alisher Navoiy tavalludining 584 yilligi alloma nomi bilan ataluvchi viloyat xalqi uchun o‘zgacha quvonch va kayfiyat ulashmoqda. Ayni paytda bu sanaga bag‘ishlangan maʼnaviy-maʼrifiy tadbirlar rang-barang dasturlar asosida yirik korxonalar, muassasalarda ham ko‘tarinki ruhda davom etmoqda. Anjumanlarda dunyo mamlakatlari va respublikamiz hududlaridan kelgan taniqli navoiyshunos olimlar, ijodkor ziyolilar, adabiyot, sanʼat, maʼnaviyat namoyondalari ishtirok etmoqda. Ana shunday tadbirlardan biri – “Alisher Navoiy hayoti va ijod yo‘li” mavzusidagi davra suhbati “NKMK tarixi” muzeyida tashkil etildi.

Navoiy kon-metallurgiya kombinati ishchi-xodimlari ishtirokida o‘tkazilgan tadbirda yurtimizning taniqli olim va shoirlari – Respublika Maʼnaviyat va maʼrifat markazi rahbari Otabek Hasanov, O‘zbekiston Respublikasi Fanlar akademiyasi vitse-prezidenti Bahrom Abduhalimov, “Tafakkur” jurnali bosh muharriri, O‘zbekiston xalq yozuvchisi Erkin Aʼzam, “Jadid” gazetasi bosh muharriri, O‘zbekiston xalq shoiri Iqbol Mirzo chiqish qilib, so‘z mulkining sultoni hayoti va ijodi haqida so‘z yuritdi.

- Joriy yil navoiyliklar uchun quvonchli keldi. O‘zbekiston Respublikasi Prezidenti Shavkat Mirziyoyev tashabbusi bilan 2025-yil Navoiy viloyatida “Alisher Navoiy yili”, deb eʼlon qilingani, bu – ulug‘ zotga yuksak eʼtibor, ehtirom namunasidir. Shu munosabat bilan bugun turli mamlakat va yurtimiz hududlaridan navoiyshunos olim va taniqli ijodkorlar, adabiyot, sanʼat, maʼnaviyat namoyondalari Navoiy viloyatiga tashrif buyurdi. Ayniqsa, “Alisher Navoiy va Sharq Renessansi” IV xalqaro simpoziumida eshittirilgan davlatimiz rahbari tabrigi, 2025-yil Navoiy viloyatida “Alisher Navoiy yili”,  deb eʼlon qilish bo‘yicha Prezident qarori qabul qilingani, tashkilotchilar sanaga puxta va yuqori saviyada tayyorgarlik ko‘rgani barchamizni yanada to‘lqinlantirib yubordi. Navoiy kon-metallurgiya kombinatida o‘tayotgan tadbirda ham yana bir bor tasdig‘ini ko‘rib turibmiz, - deydi Respublika Maʼnaviyat va maʼrifat markazi rahbari Otabek Hasanov.

Tadbir “Farhod” madaniyat saroyi xonandalarining Navoiy g‘azallariga bastalangan qo‘shiqlari bilan boshlandi. Shundan so‘ng, mehmonlar so‘z olib, Hazrati Mir Alisher Navoiy hayoti va ijodi haqida o‘z fikr-mulohazalarini bildirdi.

- Shaxsan o‘zim ham Navoiy ijodi, g‘azallari shaydosiman. Buyuk bobomiz asarlari, g‘azallarini sevib o‘qiyman. Shunda, “Farhod va Shirin” dostonida keltirilgan mehnat va mashaqqat bilan yor vasliga yetishgan qahramonlarni go‘yoki bugun Qizilqum sahrosida tog‘ni talqon qilayotgan alp yigit-qizlarga qiyoslayman. To‘rt yoshida maktab ilmini egallagan, yetti yoshida “Mantiqut-tayr” asari va olti mingdan ziyod hadisni yod olgan, o‘n yoshidan g‘azal yozib, o‘n besh yoshida katta shoir bo‘lib tanilgan, o‘nlab nodir kitoblar yaratgan, davlat arbobi sifatida ulkan bunyodkorlik ishlarini amalga oshirgan bobomizning hayot yo‘li biz uchun katta ibrat maktabidir, - deydi Markaziy ilmiy-tadqiqot laboratoriyasi xodimi Shohsanam Nazarova.

Ayniqsa, tadbirga mos ruhda tayyorlangan videorolik, adabiyot va sanʼat namunalari ko‘rgazmasi, kombinatda mehnat qilayotgan ijodkorlar va ularning farzandlari tomonidan aytilgan sheʼr-g‘azallar, “Farhod” madaniyat saroyi xonandalarining Navoiy g‘azallariga bastalangan qo‘shiqlar bilan chiqishlari davraga o‘zgacha zavq bag‘ishladi.

- Bilasizmi, Alisher Navoiy yashab o‘tgan davr bilan bugungi kunni qariyb olti asr ajratib turibdi. Lekin shuncha vaqt o‘tsada, buyuk alloma bobomizning shoh asarlari, g‘azallari o‘z ahamiyati, qadr-qimmatini yo‘qotgani yo‘q. Sevib o‘qilib, sanʼatkor-sozandalar tomonidan mahorat bilan ijro etilmoqda. Tadbirda meni quvontirgan va anglagan narsa shu bo‘ldiki, buyuk shoir asarlari o‘nlab tillarga tarjima qilingani, ehtirom ramzi sifatida dunyoning 14 ta shahrida bobomiz haykali o‘rnatilgani yangilik bo‘ldi. Demakki, buyuk mutafakkir bobomiz hayoti va ijodi barhayot yashaydi va mangulikka daxldordir, - deydi “Zarmitan” koni muhandisi Abduhamid Qurbonov.

Tadbirda “NKMK” AJ Boshqaruvi raisi – Bosh direktori Quvondiq Sanaqulov, Kinematografiya agentligi direktori Shuhrat Rizayevlar ishtirok etishdi.

Bu kabi maʼnaviy tadbirlar, navoiyxonlik kechalari kombinat bo‘linmalarida ham davom etmoqda.

“NKMK” AJ Matbuot xizmati.