• Yaratildi: 26.12.2024
• Yangilandi: 26.12.2024
• O'qildi: 51

Ehtiyojmand oilalarga bayram kayfiyati ulashildi

IJTIMOIY MASʼULIYAT

Ko‘ngil so‘rash xalqimizga xos qadriyat. Navoiy kon-metallurgiya kombinati ijtimoiy masʼuliyatni zimmasiga olib, ijtimoiy himoyaga muhtoj oilalar, yolg‘iz keksalar, bolajonlarni moddiy va maʼnaviy qo‘llab-quvvatlashga alohida eʼtibor qaratmoqda. Yangi yil bayrami munosabati bilan kombinat maʼmuriyati va kasaba uyushmasi Kengashi hamkorligida xayrli ishlar amalga oshirilyapti.

Xususan, bayram oldidan korxona tomonidan 1,5 mingta ehtiyojmand oilalarga g‘amxo‘rlik ko‘rsatilib, 16 turdagi oziq-ovqat jamlanmalari tarqatilayapti. Shuningdek, “Kambag‘allikdan farovonlik sari” dasturi doirasida Zarafshon, G‘ozg‘on shaharlari, Uchquduq, Tomdi va Nurota tumanlaridagi 14 ta mahalla fuqarolar yig‘inlaridagi 200 ta ehtiyojmand oila va ularning farzandlariga Yangi yil sovg‘asi va kitoblar to‘plamlari hamda oziq-ovqat jamlanmalari tuhfa etilmoqda. Kuni kecha “NKMK” AJ vakillari G‘ozg‘on shahrining “Shayxon” va “Marmarobod” mahallalaridagi ehtiyojmand oilalar holidan xabar oldilar.

-  Bayram kunlarida ehtiyojmand oilalarga g‘amxo‘rlik ko‘rsatib kelayotgan davlatimiz Rahbariga o‘z minnatdorchiligimni bildiraman. Quvonarlisi, shu kunlarda bir guruh kombinat vakillari mahalla faollari hamrohligida xonadonimizga kelib, bayram bilan tabriklagani va oziq-ovqat to‘plamlarini ulashgani oilamizga xursandchilik bag‘ishladi. Buning uchun barcha tashkilotchilarga katta rahmat!, - deydi G‘ozg‘on shahri “Shayxon” mahallasida yashovchi Nilufar Husaynova.

Bir so‘z bilan aytganda, amalga oshirilayotgan bu kabi xayrli ishlar mamlakatimizda inson qadrini ulug‘lashga xizmat qiladi.  

“NKMK” Matbuot xizmati.