• Yaratildi: 16.10.2024
• Yangilandi: 16.10.2024
• O'qildi: 103

London fond birjasida “NKMK” AJning ilk xalqaro korporativ obligatsiyalarini joylashtirish doirasida rasmiy tadbir bo‘lib o‘tdi

Jahonda globallashuv va raqobat tobora kuchayayotgan bugungi vaziyat mamlakatimiz iqtisodiyot tarmoqlarini rivojlantirishni taqoza etmoqda. Muhtaram Prezidentimiz Shavkat Mirziyoyevning tashabbuslari asosida “Navoiy kon-metallurgiya kombinati” aksiyadorlik jamiyatini xalqaro moliya bozorining teng huquqli ishtirokchisiga aylantirish, korporativ boshqaruv tizimini joriy qilish, mavjud ishlab chiqarish quvvatlarini kengaytirish va eng asosiysi, sohaga to‘g‘ridan-to‘g‘ri xorijiy investitsiyalarni jalb etishni rag‘batlantirish jarayonlari amalga oshirilmoqda.

O‘zbekiston Respublikasi Prezidentining 2024-yil 22-maydagi tegishli qaroriga muvofiq “NKMK” AJ uzoq muddatli resurs bazasi bilan taʼminlangan, Iqtisodiy va operatsion samaradorligi yuqori va istiqbolli investitsiya dasturlarini davlat kafolati va ko‘magisiz mustaqil moliyalashtirish imkoniyatiga ega bo‘lgan zamonaviy korxonaga aylantirish, bunda xalqaro standartlarga asosan investitsiya jarayonlarini boshqarishning ko‘p bosqichli usulini joriy etish, xalqaro kredit reytingini qo‘lga kiritish, xalqaro obligatsiyalarni muomalaga chiqarish kabi bir qator muhim vazifalar belgilangan.

Mazkur vazifalar o‘z vaqtida, samarali bajarilishi natijasida, joriy yilning 11-oktabr kuni kombinat vakillari ilk bor 1,0 milliard AQSh dollari miqdoridagi xalqaro korporativ obligatsiyalarni chiqarish va London fond birjasida joylashtirish munosabati bilan tashkillashtirilgan rasmiy tadbirda ishtirok etishdi. Mazkur tadbirda O‘zbekiston Respublikasining Buyuk Britaniya va Shimoliy Irlandiya Birlashgan Qirolligidagi elchixonasi va hamkor banklar vakillari qatnashishdi.

Tadbir avvalida “NKMK” AJ Boshqaruv raisi – Bosh direktori Q. Sanaqulov ramziy tarzda korxonaning ilk xalqaro korporativ obligatsiyalarining London fond birjasidagi savdolarini ochib berdi.

Tadbirda Q. Sanaqulov kombinatning xalqaro kapital bozoriga integratsiya qilish jarayonida muhim o‘rin tutgan, ilk xalqaro korporativ obligatsiyalarini muvaffaqiyatli emissiyasiga o‘z hissasini qo‘shgan barcha ishtirokchilarga, shu jumladan, xalqaro banklar hamda London fond birjasi rahbariyati va vakillariga chuqur minnatdorchiligini bildirdi.

Tadbir yakunida kombinat vakillari London fond birjasining emitentlarni ro‘yxatga oluvchi kitobini imzolashdi. 


Xalqaro korporativ obligatsiyalarni chiqarish kombinatning jahon kapital bozorlaridagi o‘z o‘rnini egallash va investitsion jozibadorligini oshirish orqali istiqbolli loyihalarni barqaror moliyalashtirishni taʼminlaydi.

Kombinatning xalqaro korporativ obligatsiyalarining xalqaro kapital bozorida muvaffaqiyatli joylashtirilishi, eng avvalo, mamlakatimizda olib borilayotgan islohotlar investorlar tomonidan ijobiy baholanayotganligidan dalolatdir. Xalqaro korporativ obligatsiyalar joylashtirilishidan tushadigan mablag‘larni kombinatning yirik investitsion loyihalarini moliyalashtirishga yo‘naltirish rejalashtirilmoqda.


Maʼlumot uchun: Joriy yilning iyul oyida “NKMK” AJ “S&P Global Ratings” va “Fitch Ratings” reyting agentliklari tomonidan “Barqaror” prognozi bilan ilk marotaba xalqaro “BB-” kredit reytingi darajasida baxolandi. Ushbu bilan birga, “S&P Global Ratings” agentligi kombinatning mustaqil kredit to‘lov qobiliyatini (SASP) “bb+” darajasida baholadi. Bu esa o‘z navbatida xalqaro kapital bozoriga chiqish imkonini yaratdi.

Aksiyadorlik jamiyati shaklida faoliyat yuritayotgan kombinat o‘z rivoji uchun investitsiyalarni qimmatli qog‘ozlar chiqarish va joylashtirish orqali maqbul shartlarda moliyalashtirish imkoniga ega bo‘ldi.

Kombinatni xalqaro kapital bozoriga integratsiyalashdan kuzatilgan asosiy maqsad korxonani xalqaro biznes olib boradigan zamonaviy kompaniyaga aylantirishdir.

Jahongir HASANOV,
“NKMK” AJ Bosh direktorining iqtisod va moliya
ishlari bo‘yicha o‘rinbosari.