• Yaratildi: 19.09.2024
• Yangilandi: 19.09.2024
• O'qildi: 1944

Zarafshon ta’mirlash-mexanika zavodi faoliyati kengaymoqda

600 nafardan ziyod ishchi-xodim mehnat qilayotgan Zarafshon ta’mirlash-mexanika zavodida avval mahalliylashtirilgan, import o‘rnini bosuvchi va asosiy faoliyat turi bo‘yicha 2 ming turdan ortiq mahsulotlar ishlab chiqarilgan bo‘lsa, ayni paytda bu mahsulotlar turlari 8 mingtaga yetdi. Investitsiya dasturi doirasida yirik loyihalarning amalga oshirilishi, yangi zavodlarning barpo etilishi hamda qo‘shimcha quvvatlarning ishga tushirilishi natijasida zavod mahsulotlariga bo‘lgan talab yildan-yilga ortib bormoqda.

Misol uchun, korxonada 2018-yilda 48,3 mlrd. so‘mlik mahsulot ishlab chiqarilgan bo‘lsa, bu ko‘rsatkich 2023-yilga kelib 181,1 mlrd. so‘mga yetdi. Joriy yilning o‘tgan davrida 111,8 mlrd. so‘mlik mahsulot ishlab chiqarildi va yil oxiriga qadar ishlab chiqarish hajmini 191,8 mlrd. so‘mga yetkazish rejalashtirilgan. Bu, 2023-yilga nisbatan 6 foizga ko‘p demakdir.

Zavodda 1 ta sex, 6 ta uchastka, byuro va xizmatlar faoliyat ko‘rsatadi. Ilgari Markaziy kon boshqarmasiga qarashli ko‘p tarmoqli sex bo‘lgan bu sanoat korxonasi bugungi kunga kelib yirik zavod maqomini oldi. Zavod Navoiy kon-metallurgiya kombinati bo‘linmalari uchun zarur jihozlar va moslamalarni o‘z vaqtida, sifatli ta’mirlash va tayyorlab berishga xizmat qiladi. Zaruriy jihoz va moslamalarga talabning oshishi tufayli ishlab chiqarish ko‘lami yanada kengaymoqda.

Zarafshon ta’mirlash-mexanika zavodi direktori Yuldash G‘aniyev taʼkidlaganidek:

“Birgina 2020-yilda konveyyerlar uchun oyiga 100 ta rolik tayyorlangan bo‘lsa, hozir bu ko‘rsatkich 1 200 dan ziyodni tashkil etayapti. So‘nggi yillarda qo‘shimcha yangi rusumdagi bir necha suv nasoslari tayyorlanmoqda, nasoslarni ta’mirlash 1,5 baravarga ko‘paydi. Korxonamiz faoliyatida mahalliylashtirish muhim o‘rin tutadi. Kombinatning deyarli barcha bo‘linmalari buyurtmalarini tayyorlaydigan jamoamiz mahalliylashtirish dasturi doirasida samarali natijalarga erishmoqda. Korxonada 2018-2023-yillarda 150,1 mlrd. so‘mlik mahsulot ishlab chiqarildi. O‘tgan yili mahalliylashtirish dasturi doirasida 31 ta loyiha bo‘yicha ishlab chiqarilgan mahsulotlar qiymati 26,56 mlrd. so‘mni tashkil etib, 2018-yilga nisbatan 2 barobarga oshdi.”

Kombinat rahbariyati va mutaxassislari bilan hamkorlikda bir necha istiqbolli rejalarni amalga oshirish ko‘zda tutilgan. Jumladan, zamon talablaridan kelib chiqib, metallarga lazer orqali ishlov berish dastgohlarini yo‘lga qo‘yish, zavod hududida barcha gaz-olov ishlariga quvurlar orqali kislorod yetkazib berishni loyihalashtirib, uni ishlab chiqarishga tadbiq qilish ustida ishlar olib borilmoqda.

Bundan tashqari, eskirgan avtoshinalarni qayta ishlash va utilizatsiya qilish bo‘yicha loyiha hujjatlari ishlab chiqilgan bo‘lib, ushbu loyiha orqali Markaziy kon boshqarmasi bo‘linmalaridan chiqqan yaroqsiz shinalarni qayta ishlab, piroliz suyuqligi va metallom olish yo‘lga qo‘yiladi. Natijada chiqindini qayta ishlash, undan tayyor mahsulot olish hamda qo‘shimcha ish o‘rni yaratilishiga erishiladi.  

“NKMK” AJ Matbuot xizmati.