• Yaratildi: 09.09.2024
• Yangilandi: 09.09.2024
• O'qildi: 1518

Mahalliylashtirish dasturi ijrosiga bag‘ishlangan matbuot anjumani o‘tkazildi

9-sentabr kuni “NKMK” AJning matbuot anjumanlarini o‘tkazish zalida “Navoiy kon-metallurgiya kombinatida mahalliylashtirish dasturi ijrosi: yutuq va rejalar” mavzusida ommaviy axborot vositalari vakillari va jurnalistlar uchun matbuot anjumani o‘tkazildi.

2030-yilgacha O‘zbekiston Respublikasini rivojlantirish strategiyasining ustuvor yo‘nalishlaridan biri – ishlab chiqarishni mahalliylashtirishni rag‘batlantirishni davom ettirish hamda ehtiyot va butlovchi buyumlar importining o‘rnini bosish, tarmoqlararo sanoat kooperatsiyasini kengaytirish hisoblanadi.

Bu borada “NKMK” AJ tomonidan ishlab chiqarishni mahalliylashtirishning asosiy yo‘nalishlaridan biri – sanoat mahsulotlarini ishlab chiqarish jarayoniga ilmiy izlanish natijalari va zamonaviy innovatsion texnologiyalarni joriy qilish orqali mahalliy xom ashyo hamda sanoat kooperatsiyasi negizida tayyor mahsulotlar, butlovchi buyumlar va materiallar ishlab chiqarishni mahalliylashtirish va sanoat tarmoqlarida kooperatsiya aloqalarini jadallashtirishdir.

Taʼkidlash kerakki, kombinatda ishlab chiqarishni mahalliylashtirish dasturi 2000-yildan buyon amalga oshirilib kelinmoqda.

Kombinatning ishlab chiqarish ehtiyojlarini qondirish uchun so‘nggi uch yilda korxonaning quvvatlarida 1,6 trln. so‘mlik mahalliylashtirilgan mahsulotlar ishlab chiqarildi va tarmoqlararo kooperatsiya doirasida 14,2 trln. so‘mlik sanoat mahsulotlari xarid qilindi. 2024-yilda ham Mahalliylashtirish dasturi asosida kombinatda 183 ta loyiha doirasida 905 mlrd. so‘mlik mahsulot ishlab chiqarish rejalashtirilgan. Joriy yilning yanvar-avgust oylarida Mahalliylashtirish dasturi doirasida 177 ta loyiha bo‘yicha 620 mlrd. so‘mlik mahsulotlar ishlab chiqarilib, o‘tgan yilning mos davriga nisbatan o‘sish surʼati 142,4 foizni tashkil etdi.

Bundan tashqari, mahalliy ishlab chiqaruvchilarni qo‘llab-quvvatlash maqsadida joriy yilning yanvar-avgust oylarida tarmoqlararo sanoat kooperatsiyasi doirasida ulardan 4,4 trln. so‘mlik import o‘rnini bosuvchi mahsulotlar xarid qilinib, 2023-yilning mos davriga nisbatan o‘sish surʼati 122,6 foizni tashkil etdi.

Respublikamizda birinchi bo‘lib Navoiy kon-metallurgiya kombinatida joriy etilgan “shatakka olish” mexanizmi doirasida ham salmoqli ishlar amalga oshirilmoqda. Mahalliy korxonalarni texnologik qo‘llab-quvvatlash orqali so‘ngi uch yilda 1 400 turdan ziyod 1,4 trln. so‘mlik sanoat mahsulotlari hamkorlikda ishlab chiqarilib, kombinat ishlab chiqarish jarayonlariga jalb etildi.

“NKMK” AJ Mahalliylashtirish dasturlarini shakllantirish va monitoring qilish bo‘limi boshlig‘i o‘rinbosari Fexruz Mardonov taʼkidlaganidek:

“2030-yilgacha kombinatni barqaror rivojlantirish dasturi doirasida yangi loyihalarni ishga tushirish va amaldagilarni kengaytirish hisobiga 2025-yilda 185 ta loyiha doirasida 1 trln. so‘mlik mahsulot ishlab chiqarish, mahalliylashtirilgan mahsulotlarni ishlab chiqarish hajmini 2024-yilga nisbatan 113 foizga oshirish ko‘zda tutilgan. Dasturga kiritilgan loyihalarning mahalliylashtirish darajasini o‘rtacha 65 foizga ko‘tarish rejalashtirilgan. Mahalliylashtirilgan mahsulotlar tannarhida import qilinayotgan mahsulotlarni (asosan metall prokati) yirik tarmoq va mahalliy korxonalar quvvatlarida o‘zlashtirish maqsad qilingan.”

Tadbirda OAV vakillari va jurnalistlarning savollariga atroflicha javoblar berildi.

“NKMK” AJ Matbuot xizmati.