• Yaratildi: 06.09.2024
• Yangilandi: 06.09.2024
• O'qildi: 1505

Tegirmonlar – ishlab chiqarishning muhim bo‘g‘ini

“Navoiy kon-metallurgiya kombinati” AJda turlicha vazifalarni bajaradigan ko‘plab bo‘linmalar faoliyat yuritib kelayapti. Ular orasida kombinat boshqarmasining bosh mexanik bo‘limi korxonadagi ishlab chiqarish texnika va uskunalarining uzluksiz ishlashini taʼminlash kabi muhim yo‘nalishni muvofiqlashtiruvchi bo‘linma hisoblanadi.

Ayni paytda gidrometallurgiya zavodlarida 122 ta asosiy va 30 ga yaqin yordamchi tegirmonlar mavjud. Ular doimiy ravishda ish holatda bo‘lishi mazkur bo‘lim mutaxassislari nazoratida. Jumladan, 1-gidrometallurgiya zavodida 6 ta, 2-gidrometallurgiya zavodida 77 ta, 3-gidrometallurgiya zavodida 15 ta, 4-gidrometallurgiya zavodida 4 ta, 5-gidrometallurgiya zavodida 6 ta, 6-gidrometallurgiya zavodida 4 ta, 7-gidrometallurgiya zavodida 8 ta, “Marjonbuloq” oltin ajratish sexida 2 ta shunday asosiy tegirmonlar bir maromda ishlab turibdi.

Mazkur tegirmonlar orqali har kuni o‘rtacha 0,28 mln. tonna, bir yilda qariyb 100 mln. tonna maʼdan qayta ishlanmoqda.

Taʼkidlash joizki, yirik o‘lchamdagi tegirmonlar, ular uchun zarur asbob-uskuna va ehtiyot qismlarning asosiy qismi mahaliylashtirilib, Navoiy mashinasozlik zavodi va kon boshqarmalari bo‘linmalarida tayyorlanmoqda. Ushbu tegirmonlar kombinatda ishlab chiqarilishi yo‘lga qo‘yilganligi mablag‘larni iqtisod qilish imkonini bermoqda.

 “NKMK” AJ Matbuot xizmati.