• Yaratildi: 30.08.2024
• Yangilandi: 30.08.2024
• O'qildi: 1324

Markaziy fizika-kimyoviy laboratoriyasi yangi binoda ish boshladi

Mamlakatimiz mustaqilligining o‘ttiz uch yilligi arafasida “NKMK” AJ Shimoliy kon boshqarmasi Markaziy fizika-kimyoviy laboratoriyasining yangi binosi ochilib, uning tarkibida zamonaviy biolaboratoriya ishga tushirildi.

Yangi biolaboratoriyada 3-gidrometallurgiya zavodida qo‘llanilayotgan “BIOX” bakterial oksidlash jarayonida bakteriyalarni o‘rganish, ularning faolligini oshirish, ozuqa moddalari sarfini optimallashtirish hamda oksidlash jarayonini yaxshilash bo‘yicha tadqiqotlarni tizimli olib borish imkoniyatlari mavjud. Laboratoriyaga o‘rnatilgan barcha uskuna va jihozlar Navoiy mashinasozlik zavodida tayyorlandi.

Markaziy fizika-kimyoviy laboratoriyasi boshlig‘i Alisher Botirov taʼkidlaganidek:

“Zavodda biooksidlash jarayoni tarkibida oltin bo‘lgan sulfidli flotatsiya konsentratlarini turli bakteriyalar yordamida oksidlanishiga asoslangan. Hozirda “BIOX” sexidagi 6 ta bioreaktorda 12 ta biooksidlash modullari mavjud bo‘lib, ular ishlab chiqarish surʼatini taʼminlashga xizmat ko‘rsatmoqda. Bugun ishga tushirilgan biolaboratoriya oyiga 10 mingdan ortiq namunani tahlil qilish quvvatiga ega. Uning qulayliklari esa ishlab chiqarish, tadqiqot ishlarida samaradorlikni taʼminlaydi.

Tadbirda Shimoliy kon boshqarmasi rahbariyati, korxona ishchi-xodimlari ishtirok etishdi.

“NKMK” AJ Matbuot xizmati.