• Yaratildi: 28.08.2024
• Yangilandi: 28.08.2024
• O'qildi: 1511

“NKMK” AJda ISO 37001:2016 xalqaro standarti joriy etildi

“Navoiy kon-metallurgiya kombinati” aksiyadorlik jamiyati faoliyatida xalqaro standartlarni joriy etish, ochiqlik va shaffoflikni taʼminlash, korrupsiyaga qarshi kurash borasida tizimli ishlar olib borilmoqda.

Joriy yilda kombinatda korrupsiyaga qarshi kurashish sohasida tashkil etilgan boshqaruv tizimi va mexanizmlar “Korrupsiyaga qarshi kurashish menejment tizimi” ISO 37001:2016 xalqaro standarti talablariga muvofiqligi “CERT International” tashkiloti tomonidan tashqi auditdan o‘tkazildi.

28-avgust kuni “CERT International” tashkiloti tomonidan kombinatga ISO 37001:2016 xalqaro standart sertifikati topshirildi. Sertifikatni “NKMK” AJ Boshqaruvi raisi – Bosh direktori Quvondiq Sanaqulov qabul qildi.

Tadbirda O‘zbekiston Respublikasi Korrupsiyaga qarshi kurashish agentligi direktori Akmal Burxanov videokonferens aloqa orqali ishtirok etib, o‘z fikr-mulohazalarini bildirdi.

Tadbirda mazkur xalqaro standart kompaniyada korrupsiyaga qarshi kurashning samarali tizimini yaratishning xalqaro usullarini o‘zida jamlash va korrupsiyaga qarshi mukammal boshqaruv tizimini yo‘lga qo‘yishga xizmat qilishi to‘g‘risida so‘z yuritildi.

Komplayens xizmati boshlig‘i Rustam Avezov taʼkidlaganidek:

“Komplayens xizmatining asosiy vazifalari korrupsiyaga oid huquqbuzarliklarni o‘z vaqtida aniqlash, ularga chek qo‘yish va ularni keltirib chiqaruvchi sabab va shart-sharoitlarni aniqlab bartaraf etish chorlarini ko‘rish, ishchi-xodimlar uchun huquqiy targ‘ibot va profilaktik tadbirlar o‘tkazish, xaridlar sohasini nazorat qilish, o‘rganish va xizmat tekshiruvlarni o‘tkazish, xalqaro sertifikatlarni olish hamda xodimlarning malakasini oshirishdan iboratdir.”

“NKMK” AJda faoliyatida ISO 37001:2016 xalqaro standarti joriy etilishi kompaniyaga nisbatan fuqarolarning ishonchini oshirish, kombinatning xalqaro nufuzi, imidjini yuksaltirish uchun muhim ahamiyat kasb etadi.

“NKMK” AJ Komplayens xizmati.