• Yaratildi: 19.08.2024
• Yangilandi: 19.08.2024
• O'qildi: 1045

Ishchi-xodimlarning hayoti va salomatligi doimiy eʼtiborda

“Navoiy kon-metallurgiya kombinati” AJda inson hayoti, sog‘ligi bilan bog‘liq bo‘lgan mehnat muhofazasi va xavfsizlik texnikasini taʼminlash masalasiga katta eʼtibor qaratilib kelinmoqda. Xavfsiz mehnat muhitini taʼminlash nafaqat majburiyatdir, balki kompaniyaning muvaffaqiyatli faoliyat olib borishi uchun asos bo‘ladi.

Kombinat tomonidan shaxtalarni toza havo bilan taʼminlash, zaharli moddalar darajasi va elektr jihozlarining xavfsizligini nazorat qilish kabi milliy va xalqaro mehnat xavfsizligi standartlariga qatʼiy rioya qilinmoqda. Ish joyi holatini monitoring qilish va avtomatlashtirilgan boshqaruv tizimlari kabi ilg‘or texnologiyalarning joriy etilishi xavflarni kamaytirish va ish joyida xavfsizlik darajasini oshirishga yordam beradi, bu mehnat sharoitlarini muntazam tekshirish va yuzaga kelishi mumkin bo‘lgan xavflarni aniqlash hamda baxtsiz hodisalarning oldini olishga xizmat qilishi tabiiy.

Xavfsizlik texnikasi bo‘yicha yo‘riqnomadan o‘tkazish, favqulodda vaziyatlarda harakatlanish bo‘yicha mashg‘ulotlar va birinchi yordam ko‘rsatish bo‘yicha olib borilayotgan chora-tadbirlar ishchi-xodimlarga xavfli vaziyatlarda qanday yo‘l tutushida dasturilamal bo‘lmoqda. Asbob-uskunalarni boshqarish va yangi texnologiyalarni o‘zlashtirish bo‘yicha xodimlarni o‘qitishga katta eʼtibor qaratilayotgani esa, turli hodisalar oldini olinishini taʼminlamoqda.

NKMK ishchi-xodimlari maxsus kiyim va shaxsiy himoya vositalari bilan doimiy taʼminlab borilmoqda. Tibbiy yordam olish va muntazam tibbiy ko‘riklarni tashkil etish mehnat sharoitlari bilan bog‘liq kasalliklarni o‘z vaqtida aniqlash va davolashga yordam bermoqda. Baxtsiz hodisalar to‘g‘risidagi maʼlumotlarni doimo tahlil qilish, shuningdek ularning sabablarini aniqlash mehnatni muhofaza qilish qoidalariga rioya qilishni yaxshilash imkonini bermoqda.

Yuqoridagi maqsadlarga erishish uchun ish joylarida mehnatni muhofaza qilish va xavfsizlik texnikasi qoidalariga rioya etilishini tekshirish bo‘yicha yangi elektron dastur joriy etilib, har oyda tekshirish natijalarini tahlil qilib borilmoqda.

Ishchi-xodimlar hayotiga g‘amxo‘rlik qilish mehnatni muhofaza qilishga qaratilgan yondashuvdan boshlanadi. Faqatgina ushbu jihatlarga tizimli va izchil yondashish bilan xavflarni kamaytirish, xodimlarning hayotini asrash va kompaniyaning muvaffaqiyatli rivojlanishini taʼminlash mumkin.

“NKMK” AJ Matbuot xizmati.