• Yaratildi: 15.08.2024
• Yangilandi: 15.08.2024
• O'qildi: 1251

Mamlakatimiz iqtisodiy farovonligini ta’minlash yo‘lida

O‘zbekistonning davlat mustaqilligiga erishishi Navoiy kon-metallurgiya kombinati jamoasi uchun yuksak natijalar va yangi marralarni qo‘lga kiritishi uchun keng imkoniyatlarni yaratdi. So‘nggi yillarda chuqur o‘ylangan investitsion loyihalar izchil amalga oshirilib, samaradorlik yildan-yilga ortib borayotgani tufayli kombinat mamlakatimizdagi ilg‘or sanoat korxonasi va jahonda oltin ishlab chiqaruvchi yetakchi kompaniyalardan biriga aylandi.

Ayni paytda NKMK faoliyatining asosiy yo‘nalishlari yer osti boyliklaridan foydalanish samaradorligini, ishlab chiqarilayotgan yuqori likvidli mahsulotlar hajmini oshirish va ishlab chiqarishga yangi texnik yechimlarni joriy etishni jadallashtirish orqali Yangi O‘zbekistonning iqtisodiy farovonligi, barqaror o‘sishi va ijtimoiy barqarorligini ta’minlashga qaratilgan.

Korxonaning tajribali va yuqori malakali mutaxassislari, loyihachilar, quruvchilar, konchilar, metallurglar murakkab vazifalarni bajarish yo‘lida sidqidildan mehnat qilayotgani, mutaxassislarimizning ilmiy izlanishlari o‘z samarasini berayotgani keyingi yillarda erishilgan muvaffaqiyatlar bilan ham yaqqol tasdig‘ini topmoqda.

7-gidrometallurgiya zavodida yiliga 15 mln. tonna texnogen chiqindilarni qayta ishlash texnologiyasi joriy etildi. Bu zamonaviy texnologiyalarga asoslangan jahondagi chiqindilarni qayta ishlaydigan eng yirik texnologik korxonalaridan biridir. Qayta ishlashning asosiy ustunligi – ma’danni qazib olish va tashish uchun xarajatlarning yo‘qligidir. Bunday chora-tadbirlar zavodda ishlab chiqarilayotgan mahsulotlar tannarxini sezilarli darajada arzonlashtirishga olib keldi.

5-gidrometallurgiya zavodi “Auminzo-Amantoy” konida qazib olinayotgan oltin tarkibli sulfidli va oksidli maʼdanni qayta ishlaydi. Zavodning o‘ziga xos jihati shundaki, yangi texnologiya va asbob-uskunalarni joriy etish tufayli kombinatda maʼdanni qayta ishlashning birlashtirilgan texnologik sxemasidan foydalaniladi.

Nurota tumanidagi “Pistali” koni negizida o‘tgan yili ishga tushirilgan yiliga 4 mln. tonna maʼdanni qayta ishlash quvvatiga ega 6-gidrometallurgiya zavodi ham ana shunday yutuqlarning davomi bo‘ldi.

Ayni paytda Yangi O‘zbekistonning so‘nggi yillarda ishga tushirilgan zavodlari respublikamiz iqtisodiyotini rivojlantirish, xalqimiz farovonligini yuksaltirishga xizmat qilmoqda.

“NKMK” AJ Matbuot xizmati.