• Yaratildi: 13.08.2024
• Yangilandi: 13.08.2024
• O'qildi: 1189

“Zarmitan” sanoat maydonida investitsion loyihani amalga oshirish ishlari davom etmoqda

Keyingi yillarda Navoiy kon-metallurgiya kombinatida yirik investitsion loyihalar bosqichma-bosqich amalga oshirilayotgani korxona faoliyatida Investitsiya dasturi muhim ahamiyat kasb etishidan dalolatdir.

Oldin xabar berganimizdek, 2024-yilda kombinat tomonidan Investitsiya dasturi doirasida 11 ta loyiha amalga oshirilishi rejalashtirilgan. Ayni paytda barcha loyihalar bo‘yicha ishlar davom etmoqda. Xususan, umumiy qiymati 235,6 mln. AQSh dollari bo‘lgan “Zarmitan” konining quyi gorizontlarini o‘zlashtirish ana shunday istiqbolli loyihalardan biridir. 

O‘zbekiston konchilik tarixida ilk marotaba Chexiya davlatining “Mine Construction Alliance s.r.o.” kompaniyasi bilan hamkorlikda Samarqand viloyati Qo‘shrabot tumanidagi “Zarmitan” sanoat maydonida olib borilayotgan “Skipli” va “Bosh” shaxtalarida tik konlarni qurish ishlari davom etmoqda.

Bugungi kunga qadar Markaziy Osiyoda birinchi marta “Skipli” va “Bosh” shaxtalari chuqurligi 1 000 metrga yetkazilib, zaruriy uskunalar bilan jihozlandi. Mutaxassislarning hisob-kitoblariga ko‘ra, joriy yilning oxiriga qadar loyihada ko‘zda tutilgan ishlar to‘liq yakunlanib, ikkala obyekt ham foydalanishga topshirilishi rejalashtirilgan.

“NKMK” AJ Janubiy kon boshqarmasi bosh muhandisning kon ishlari bo‘yicha o‘rinbosari Ozodjon Farmonovning taʼkidlashicha:

“Mazkur loyiha doirasida “Skipli” shaxtaning yillik unumdorligi 1,4 mln. tonna oltin tarkibli maʼdanni yer ostidan yer yuzasigacha olib chiqishga mo‘ljallangan va u 4-gidrometallurgiya zavodiga qayta ishlash uchun yetkazib beriladi. “Bosh” shaxta stvolining asosiy vazifasi ishchi-xodimlar va jihozlarni shaxtaga tushirib-chiqarish, shaxtadan yer osti suvlarini yer yuzasiga haydash, shaxtani toza havo oqimi bilan taʼminlash va shaxtadan tog‘ jinslarini chiqarish hisoblanadi.”

Kombinat faoliyatida bu kabi investitsion loyihalarni amalga oshirish konlarni o‘zlashtirish, qimmatbaho metallar qazib olish va qayta ishlash hajmini oshirish hamda yangi ish o‘rinlarini yaratishga xizmat qiladi.

“NKMK” AJ Matbuot xizmati.