• Yaratildi: 09.08.2024
• Yangilandi: 09.08.2024
• O'qildi: 1445

“Muruntov” konida yangi konveyer liniyalari qurilmoqda

Bugungi kunda Navoiy kon-metallurgiya kombinati korxonalarida amalga oshirilayotgan qurilishning manzilli dasturi doirasida “Muruntov” konida Shimoliy-sharqiy davriy oqim texnologiyasi majmuasi hamda 2-konveyer liniyasini kengaytirish bo‘yicha qurilish ishlari olib borilmoqda. 

Shimoliy-sharqiy davriy oqim texnologiyasi majmuasida maʼdan tashish liniyasini kengaytirishning umumiy loyiha qiymati 104,4 mlrd. so‘mni tashkil etadi. Hozirda bu bo‘yicha yangi konveyer, elektr liniyalarini qurish, ag‘darma konveyer liniyasini 1,1 ming metrga uzaytirish va boshqa yo‘nalishlarda ishlar davom etmoqda. Bu loyihaning to‘liq quvvatda ishga tushishi kelgusida tog‘ jinslarini tashish hajmini yiliga 15 mln. kubometrga oshiradi.

Xuddi shunday 2-konveyer liniyasini kengaytirishning umumiy loyiha qiymati 194,4 mlrd. so‘mdan iborat. Shu davrga qadar foydalanishda bo‘lgan 1 877,4 metrlik liniyaga qo‘shimcha tarzda ming metrdan ziyod yangi liniyani qurish ko‘zda tutilgan. Loyiha to‘liq quvvatda ishga tushirilganda yiliga 12 mln. kubometr tog‘ jinslarini tashish imkoniyati yaratiladi.

“NKMK” AJ Markaziy kon boshqarmasi kapital qurilish bo‘limi muhandisi Suxrob Samadov taʼkidlaganidek:

“Bu kabi tog‘ jinslarini liniyalar (lenta orqali tashish mexanizmi) orqali tashish eng qulay, samarali va tejamkor imkoniyat ekani amalda isbotlangan. Bu, hech shubhasiz, ish samaradorligini oshirish bilan birga, ishchi kuchi, vaqt, transport xarajatlarini, yoqilg‘i-moylash materiallarini tejash demakdir. Bu ishlarning barchasi o‘tgan davr mobaynida bu borada yetarli tajriba to‘plagan o‘zimizning mutaxassislar tomonidan amalga oshirilmoqda.”

Eʼtiborli jihati, konveyer liniyalari kombinatning Navoiy mashinasozlik zavodida to‘liq mahalliylashtirilgan holda ishlab chiqarilmoqda. Kombinat mutaxassislari aql-zakovati va izlanishlari orqali mana shunday iqtisodiy samaradorlik keltiruvchi qo‘shimcha imkoniyatlarni izlab topmoqda va bu yo‘lda davom etmoqda.

“NKMK” AJ Matbuot xizmati.