• Yaratildi: 07.08.2024
• Yangilandi: 07.08.2024
• O'qildi: 1376

Quruvchilik kasbi ulkan masʼuliyat va mashaqqat talab etadi

Avgust oyining ikkinchi yakshanbasi –

O‘zbekiston Respublikasi qurilish sohasi xodimlari kuni

 
Bunyodkorlik zamirida nafaqat qurilish yoki obodonlashtirish, balki mamlakat taraqqiyotiga hissa qo‘shish orqali xalq farovonligini taʼminlash maqsadi ham mujassamdir. Shu jumladan, Navoiy kon-metallurgiya kombinatida ham qurilish tarmog‘i tobora taraqqiy etib borayotgan yetakchi sohalardan biri hisoblanadi. Kombinat quruvchilari barpo etayotgan gidrometallurgiya zavodlari, kon va shaxtalar, temir yo‘llar, ko‘prik va yo‘llar, ijtimoiy soha obyektlari Yangi O‘zbekistonning yangi sahifasini yaratmoqda.

Kombinatning keyingi yillardagi yutuqlarida soha xodimlarining hissasi katta bo‘ldi. Kasb bayrami oldidan “NKMK” AJ bosh direktorining investitsiyalar va kapital qurilish bo‘yicha o‘rinbosari Farhod Bahronov shular haqida so‘zlab berdi:

“Bugungi kunda kombinat o‘zining zamonaviy va yirik qurilish tashkilotlariga ega. Ular orasida Investitsiyalar  boshqarmasi, Kapital qurilish boshqarmasi, Zarafshon qurilish boshqarmasi muhim ahamiyatga ega. Ularda hozirgi kunda 3,5 ming nafarga yaqin quruvchi-muhandis mehnat qilmoqda.

Darhaqiqat, kombinat bunyodkorlarining keyingi yillardagi muvaffaqiyati sifatida 2017-2023-yillarda 23 ta yirik investitsion loyiha ishga tushirildi. Xususan, 5, 6, 7-gidrometallurgiya zavodlari, 2-gidrometallurgiya zavodining ikkinchi navbati, 3-gidrometallurgiya zavodining yettinchi tegirmon bloki, yangi ochilgan “Turbay”, “Balpantov” hamda “Tomdibuloq” konlari, temir yo‘llar va boshqa obyektlar shular jumlasidandir.

Shuni alohida taʼkidlash joizki, kombinat hududlarni ijtimoiy-iqtisodiy rivojlantirish, ishchi-xodimlarga munosib yashash sharoitlarini yaratish borasida ham faol ishlarni amalga oshirib kelmoqda. Keyingi yillarda Zarafshon shahrida “Umid” bolalar reabilitatsiya markazi, 504 o‘rinli ixtisoslashtirilgan maktab-internati, favvoralar sayilgohi, Qiziltepa tumanidagi “To‘dako‘l” dam olish bazasida xalqaro shaxmat maktabi, Zomin tumanida “NKMK” sanatoriysi, Uchquduq tumanida “Oltin ko‘l” dam olish majmuasi va boshqa obyektlar barpo etilgani ham jamoa bunyodkorlarining mehnati natijasidir.

Qurilish-bunyodkorlik ishlaridan tashqari, korxonada qurilish materiallari ishlab chiqarish tarmog‘i ham yo‘lga qo‘yilgan bo‘lib, hozirda temir-beton, metall konstruksiyalar, g‘isht, qum, ohak, shag‘al, eshik-derazalar kabi 20 turdan ortiq mahsulot ishlab chiqarilmoqda.

Fursatdan foydalanib, barcha hamkasblarimizni O‘zbekiston Respublikasi qurilish sohasi xodimlari kuni bilan tabriklayman!”

“NKMK” AJ Matbuot xizmati.