• Yaratildi: 02.08.2024
• Yangilandi: 02.08.2024
• O'qildi: 1482

Temir yo‘l stansiyasida raqamlashtirilgan tizim joriy etildi

“Raqamli O‘zbekiston – 2030” strategiyasi doirasida Navoiy kon-metallurgiya kombinatida raqamli iqtisodiyotni rivojlantirish hamda zamonaviy axborot-kommunikatsiya texnologiyalarini keng joriy etish ishlari izchil amalga oshirilmoqda.

O‘zbekiston Respublikasi temir yo‘l transporti xodimlari kuni oldidan Temir yo‘l transporti boshqarmasining “Muruntov” stansiyasida temir yo‘l yuk tashishni boshqarishning releli tizimi ilk bor yangi zamonaviy mikroprotsessorli raqamlashtirilgan tizimga o‘tkazildi.

Shu munosabati bilan tashkil etilgan tadbirda korxona rahbariyati, temiryo‘lchilar, axborot-kommunikatsiya texnologiyalari xodimlari ishtirok etdi.

Tadbirda qatnashgan Zarafshon axborot-kommunikatsiya texnologiyalari markazi guruh boshlig‘i Sherzod Abdullayev taʼkidlaganidek: 

“Zamonaviy mikroprotsessorli raqamlashtirilgan tizim boshqarmamizda temir yo‘l sohasini yangi pog‘onaga olib chiqadi. Ishlab chiqarish jarayonlarida temir yo‘l infratuzilmasi strategik muhim ahamiyatga ega ekanligini hisobga olib, ushbu qariyb 10 mlrd. so‘mlik loyihaning amalga oshirilishi yuk tashishni boshqarishning Yagona aqlli tizimiga quyilgan birinchi qadam hisoblanadi.”

“Muruntov” temir yo‘l stansiyasidagi loyiha kombinatning Ishlab chiqarishni avtomatlashtirish boshqarmasi va “Trans Engineering Group” injenerlik kompaniyasi mutaxassislari tomonidan amalga oshirildi. Mazkur mikroprotsessor kontrollerlari tizimi boshqaruvi joriy etilishi kasb bayramiga munosib tuhfa bo‘ldi.

Temir yo‘l trasnporti boshqarmasi xizmat boshlig‘i Sahob Tursunovning so‘zlariga ko‘ra:

“Zamonaviy raqamlashtirilgan infratuzilma maʼdan zahiralarini tashishni ko‘paytiradi, ekspluatatsiya harajatlarini kamaytiradi hamda harakat  xavfsizligini oshiradi. Hozirgi vaqtda “Muruntov” konidan 2-gidrometallurgiya zavodiga maʼdan tashish hajmi yiliga 50 mln. tonnadan oshdi. Harakatni boshqarishning yangi raqamlashtirilgan tizimini joriy etishning eng asosiy elementlaridan biri – bu inson omilini kamaytirish va xatoliklarga yo‘l qo‘ymasdan samaradorlikka erishishdir.”

Ushbu loyiha temir yul harakatini boshqarish jarayonlarida o‘zgarishlarni tezkor sezish, transport oqimini prognozlash va tahlil qilish, svetofor ishini optimallashtirish va transport vositalari harakatini muvofiqlashtirish imkonini beradi.

“NKMK” AJ Matbuot xizmati.