• Yaratildi: 23.07.2024
• Yangilandi: 23.07.2024
• O'qildi: 1642

Investitsion loyihalar bosqichma-bosqich amalga oshirilmoqda

“Navoiy kon-metallurgiya kombinati” AJ faoliyatida Investitsiya dasturi asosiy o‘rin egallaydi. Keyingi yillarda muhim investitsion loyihalar bosqichma-bosqich amalga oshirilayotgani konlarni o‘zlashtirish, gidrometallurgiya zavodlarni ishga tushirish, amaldagilarni  modernizatsiyalash orqali qayta ishlash quvvatlari, ishlab chiqarish hajmini oshirishga, yangi ish o‘rinlarini yaratishga xizmat qilmoqda.  

Bu kabi amaliy ishlarni kombinatning eng yirik bo‘linmasi – Markaziy kon boshqarmasi misolida ham ko‘rish mumkin. Xususan, korxonada tog‘ jinsini qazib olish 2017-yilda 75,7 mln kubometrni tashkil etgan bo‘lsa, 2023-yilda bu ko‘rsatkich 166,1 mln kubometrga teng bo‘ldi. Shuningdek, maʼdanni qayta ishlash bo‘yicha ham katta natijalarga erishildi. 2-gidrometallurgiya zavodi, Oltinni uyumda ishqorlash sexida 2017-yilda 62 mln tonna maʼdan qayta ishlangan bo‘lsa, investitsion loyihalar asosida 5 va 7-GMZ, 2-GMZ ikkinchi navbati ishga tushirilishi hisobiga 2023-yilda bu ko‘rsatkich qariyb 100 mln tonnaga yetkazildi.

NKMKda 2024-yilda Investitsiya dasturi doirasida amalga oshirilishi rejalashtirilgan umumiy qiymati 1 mlrd AQSh dollari bo‘lgan 11 ta loyihaning katta qismi, yaʼni, 319,1 mln AQSh dollari bo‘lgan 8 ta investitsion loyiha Markaziy kon boshqarmasi hissasiga to‘g‘ri keladi. Jumladan, “Muruntov” konini o‘zlashtirishning 5-navbati”, “Amudaryo-Zarafshon” suv quvurining 3-liniyasini qurish va nasos stansiyalarini rekonstruksiya qilish”, “2-GMZ va 7-GMZ chiqindilarini birgalikda saqlash uchun 2-GMZ chiqindi omborini kengaytirish va rekonstruksiya qilish” singari loyihalar amalga oshirilmoqda.  

Markaziy kon boshqarmasi direktorining kapital qurilish bo‘yicha o‘rinbosari Faxritdin Umarov taʼkidlaganidek:

“Bu yo‘nalishdagi ishlar to‘g‘ri tashkil etilgani, aniq reja-jadval asosida olib borilayotgani natijasida joriy yilning birinchi yarim yilligida belgilangan reja 102 foizga bajarilib, 182,1 mln AQSh dollarlik kapital qo‘yilmalarni o‘zlashtirishga erishildi. Sakkizta loyihadan “Yo‘l transporti va muhandislik-kommunikatsiya infratuzilmasi” hamda “Markaziy kon boshqarmasi obyektlarida quyosh fotoelektr stansiyalarini qurish” loyihalari doirasida tegishli obyektlar foydalanishga topshirildi”.

Yil yakuniga qadar “Tomdibuloq”, “Balpantov”, “Turbay” konlarida qazib olish quvvatlarini kengaytirish hamda “Muruntov” koni ishchi-xodimlari uchun va “Bessopan” maydoni hududida maishiy obyektlarni qurish kabi qator loyihalarni foydalanishga topshirish mo‘ljallangan.

Bunyodkorlik ishlarini amalga oshirishda Zarafshon qurilish boshqarmasi bilan birgalikda kon boshqarmasining kapital qurilish bo‘limi, taʼmirlash-qurilish uchastkasi jamoalari ham faol ishtirok etib kelmoqda. Ular mana shunday saʼy-harakatlari bilan ko‘zda tutilgan obyektlarini o‘z vaqtida va sifatli qurib bitkazish yo‘lida astoydil mehnat qilib, kombinat yutuqlariga eʼtirofga arzigulik hissa qo‘shmoqdalar.

“NKMK” AJ Matbuot xizmati.