• Yaratildi: 17.07.2024
• Yangilandi: 18.07.2024
• O'qildi: 2419

Yangi tegirmon bloki ishga tushirildi

Navoiy kon-metallurgiya kombinatida 2024-yilda Investitsiya dasturi doirasida umumiy qiymati 1 mlrd AQSh dollari bo‘lgan 11 ta loyiha amalga oshirilishi rejalashtirilgan. Shu yilning o‘tgan birinchi yarim yilligida ushbu yo‘nalishda 363,5 mln AQSh dollarlik mablag‘larni o‘zlashtirishga erishildi. Ayni paytda esa barcha loyihalar bo‘yicha ishlar davom etmoqda. 

Ular orasida “Kokpatas va Dovgistov oltin konlarida maʼdan qazib olish (III navbati)” investitsion loyihasi ishlab chiqarish hajmini oshirishda katta ahamiyatga ega bo‘lib, uning umumiy qiymati 281,1 mln AQSh dollarni tashkil etadi. Ayni paytda ushbu loyihani amalga oshirishga qaratilgan keng ko‘lamli ishlar yuqori surʼatlarda davom etmoqda. Jumladan, 3-gidrometallurgiya zavodida barpo etilgan yiliga 1 mln tonna oltin tarkibli maʼdanni qayta ishlash quvvatiga ega yangi tegirmon bloki shulardan biridir.

Maʼlumot uchun aytish mumkinki, hozirgi kunda zavodning maʼdanni yillik qayta ishlash quvvati 8 mln tonnadan ortiq bo‘lib, yangi tegirmon blokini ishga tushirish hisobiga bu ko‘rsatkich 9 mln tonnadan oshadi.

17-iyul kuni 3-GMZda 7-tegirmon bloki ishga tushirildi. Kelgusida flotatsiya, biooksidlash, filtrlash, quritish va kuydirish sexlarini kengaytirish ham ko‘zda tutilgan. Bu esa, o‘z navbatida, ishlab chiqarish hajmini oshirishga xizmat qiladi. Buning hisobiga zavodda tegirmon bloklari soni 7 taga yetdi. Yil yakuniga qadar zavod quvvatini yanada oshirish evaziga maʼdanni yillik qayta ishlash hajmini 10 mln tonnaga yetkazish imkoni yaratiladi. 

Taʼkidlash joizki, mazkur tegirmon bloki uchun zarur asbob-uskuna va ehtiyot qismlar mahaliylashtirilib, kombinatning Navoiy mashinasozlik zavodi va Shimoliy kon boshqarmasi bo‘linmalarida tayyorlandi. Qurilish ishlari Zarafshon qurilish boshqarmasi tomonidan amalga oshirildi.

 “NKMK” AJ Matbuot xizmati.