• Yaratildi: 09.07.2024
• Yangilandi: 09.07.2024
• O'qildi: 2825

“NKMK” AJ xalqaro kapital bozoriga chiqish jarayonida

“Navoiy kon-metallurgiya kombinati” AJ tomonidan mineral-resurs bazasini rivojlantirish, konchilik va qayta ishlash quvvatlarini oshirishga xalqaro investorlarni jalb etishga qaratilgan chora-tadbirlar izchil amalga oshirilmoqda.

Ushbu ishlar doirasida 2024-yilning fevral oyida “Fitch Ratings” va “S&P Global Ratings” xalqaro reyting agentliklari bilan hamkorlik o‘rnatildi.

Natijada joriy yilning iyul oyida mazkur reyting agentliklari tomonidan “NKMK” AJ tarixida ilk marotaba kombinatga O‘zbekiston Respublikasining suveren reytingiga muvofiq “Barqaror” prognozi bilan “BB-” darajasidagi kredit reytinglari berildi.

Shu bilan birga, “S&P Global Ratings” xalqaro reyting agentligi bir vaqtning o‘zida “NKMK” AJning kreditga layoqatlilik xususiyatlarini (SACP) “bb+” darajasida baholadi, bu O‘zbekiston Respublikasi korxonalari tarixida muhim voqea bo‘ldi.

Kombinat rahbariyati va yetakchi mutaxassislarining reyting agentliklari vakillari bilan hamkorlikdagi keng ko‘lamli ishlari ushbu muvaffaqiyatga erishish uchun xizmat qildi.

Kombinat tomonidan amalga oshirilayotgan tizimli ishlar kompaniyaning O‘zbekiston Respublikasi Prezidenti Sh.M. Mirziyoyev rahbarligida raqobatbardosh iqtisodiyotni rivojlantirish bo‘yicha amalga oshirilayotgan islohotlarga qaratilganligini tasdiqlaydi.

Kredit reytingining berilishi “NKMK” AJ uchun yangi imkoniyatlarni ochadi hamda xalqaro kapital bozorlariga chiqish va qulay shartlarda investitsiyalarni jalb qilishga ko‘maklashadi.

“NKMK” AJ Matbuot xizmati.