• Yaratildi: 19.06.2024
• Yangilandi: 19.06.2024
• O'qildi: 2513

“NKMK” AJ vakillari Xalqaro obligatsiya investorlari forumida ishtirok etmoqda

18-19-iyun kunlari London shahrida Xalqaro obligatsiya investorlari forumi bo‘lib o‘tmoqda. Forumda “Navoiy kon-metallurgiya kombinati” AJ vakillari ham ishtirok etmoqda.

Mazkur forum har yili o‘tkaziladigan tadbir bo‘lib, u xalqaro kapitalga taʼsir etuvchi asosiy muammolar va joriy tendensiyalarni muhokama qilish uchun butun dunyodan emitentlar, investorlar, investitsiya banklari, reyting agentliklarining 750 dan ortiq delegat va 80 nafar ekspert-spikerlarni birlashtiradi. 33 yildan buyon forum yangi ishbilarmonlik aloqalarini o‘rnatish, faol fikr almashish, shuningdek, emitent va investorlarni birlashtirgan uchrashuv joyi bo‘lib xizmat qilmoqda.

Ushbu forum ilgari “Euromoney Conferences” nomi bilan mashhur bo‘lgan, doimiy daromadga ega bo‘lgan qarz kapitalining ixtisoslashtirilgan tadbirlarini tashkil etish sohasidagi eng yirik kompaniya – “Invesco Ltd.” kompaniyasi tomonidan o‘tkazilmoqda.

Forumda O‘zbekiston Respublikasi rasmiy delegatsiyasi tarkibida “NKMK” AJ vakillari, xususan, bosh direktorning transformatsiya masalalari bo‘yicha birinchi o‘rinbosari Ye.Antonov, bosh direktorning iqtisod va moliya bo‘yicha o‘rinbosari J.Hasanovlar ishtirok etmoqda.

Forum doirasida ekspertlar makroiqtisodiy tendensiyalar va kapital bozori faoliyatining dolzarb xususiyatlari, pul-kredit siyosati, sunʼiy intellekt va uning zamonaviy biznesga taʼsiri, rivojlanayotgan mamlakatlar uchun qarz kapitali bozorining xususiyatlari va boshqa dolzarb mavzularni muhokama qiladigan panel sessiyalari bo‘lib o‘tmoqda.

“NKMK” AJ Matbuot xizmati.