• Yaratildi: 31.05.2024
• Yangilandi: 31.05.2024
• O'qildi: 2064

Markaziy kon boshqarmasining 60 yilligi nishonlandi

31-may kuni Zarafshon shahridagi “Oltin vodiy” madaniyat uyida O‘zbekiston Respublikasi konchilik va metallurgiya sanoati xodimlari kuni hamda Navoiy kon-metallurgiya kombinatining Markaziy kon boshqarmasi tashkil topganligining 60 yilligi, 2-gidrometallurgiya zavodi va Tashqi suv taʼminoti birlashgan energoxizmatining 55 yilligiga bag‘ishlangan bayram tantanasi o‘tkazildi.

Unda Markaziy kon boshqarmasi va Zarafshon qurilish boshqarmasi bo‘linmalarida mehnat faoliyatini olib borayotgan turli kasb egalari va mehnat faxriylari ishtirok etishdi.

Tantanada “NKMK” AJ Boshqaruvi raisi – Bosh direktori Q.Sanaqulov korxonalar jamoalari, soha xodimlari va mehnat faxriylarini kasb bayrami va kon boshqarmasining 60 yilligi bilan muborakbod etib, zarafshonlik konchi va metallurglarning amalga oshirgan ishlari, yutuqlarini eʼtirof etdi.   

Shuningdek, tadbirda Markaziy kon boshqarmasi direktori E.Xalikulov so‘zga chiqib, yurtimiz iqtisodiyotini mustahkamlashga munosib hissa qo‘shib kelayotgan konchilik va metallurgiya sanoati fidoyilarini bayram bilan qutladi.

Tadbirda taʼkidlanganidek, bugungi kunda 21 ming nafardan ortiq ishchi-xodim mehnat qilayotgan Markaziy kon boshqarmasi kombinatning eng yirik bo‘linmasi hisoblanib, 2-gidrometallurgiya zavodi davlatimizning “valyuta sexi”, Tashqi suv taʼminoti birlashgan energoxizmati sahroga “obi-hayot” olib kelayotgan jamoa va bular har birining respublikamiz iqtisodiyoti, mintaqani ijtimoiy-iqtisodiy rivojlantirishda beqiyos o‘rni bor.

Kasb bayrami hamda yubiley munosabati bilan bir guruh ishchi-xodimlar ko‘p yillik fidokorona mehnati, sohani rivojlantirishga qo‘shayotgan yuksak hissasi uchun “Konchilik shuhrati” ko‘krak nishoni bilan taqdirlandi.

Bayram tantanasida “Farhod” madaniyat saroyi, “Oltin vodiy” madaniyat uyi ijodiy jamoalari va xonandalarining konsert dasturi namoyish etildi.

“NKMK” AJ Matbuot xizmati.