• Yaratildi: 29.05.2024
• Yangilandi: 29.05.2024
• O'qildi: 2892

OAV vakillari va jurnalistlar kombinat korxonalari faoliyati bilan tanishdi

29-may kuni “NKMK” AJ Markaziy kon boshqarmasi tashkil topganligining 60 yilligiga bag'ishlab ommaviy axborot vositalari vakillari va jurnalistlar uchun press-tur va matbuot anjumani o‘tkazildi.

Bugungi kunda Navoiy kon-metallurgiya kombinati nafaqat O‘zbekiston sanoatida, balki jahonning oltin ishlab chiqaruvchi yetakchi kompaniyalar qatorida o‘z o‘rni va salohiyatiga ega yirik korxonadir.

Alohida taʼkidlash kerakki, 21 ming nafardan ortiq ishchi-xodim mehnat faoliyatini olib borayotgan Markaziy kon boshqarmasi ishlab chiqarish ko‘rsatkichlari bo‘yicha kombinatning eng yirik bo‘linmasidir. Keyingi yillarda yangi gidrometallurgiya zavodlarini qurish, yangi konlarni o‘zlashtirish, amaldagi kon va zavodlarning quvvatlarini oshirish bo‘yicha yirik investitsion loyihalarning amalga oshirilishi kon boshqarmasida ishlab chiqarish surʼatini oshirishga xizmat qilmoqda.

So‘nggi yetti yilda investitsion loyihalar asosida 5, 7-gidrometallurgiya zavodlari, 2-gidrometallurgiya zavodi ikkinchi navbati ishga tushirilishi, “Muruntov”, “Auminzo-Amantoy”, “Balpantov”, “Tomdibuloq”, “Turbay” konlarida olib borilgan ishlar Navoiy kon-metallurgiya kombinati uchun yangi imkoniyat, istiqbollarni yaratdi.

Buning natijasida Markaziy kon boshqarmasida tog‘ jinsini qazib olish 2017-yilda 75,7 mln kubometrni tashkil etgan bo‘lsa, 2023-yilda bu ko‘rsatkich 166,1 mln kubometrga teng bo‘ldi. Shuningdek, maʼdanni qayta ishlash bo‘yicha ham katta natijalarga erishildi. Xususan, 2-GMZ, Oltinni uyumda ishqorlash sexida 2017-yilda 62 mln tonna maʼdan qayta ishlangan bo‘lsa, investitsion loyihalar asosida 5 va 7-GMZ, 2-GMZ ikkinchi navbati ishga tushirilishi hisobiga 2023-yilda bu ko‘rsatkich 99,3 mln tonnaga yetkazildi.

Press-tur davomida OAV vakillari va jurnalistlar jahonga mashhur “Muruntov” oltin konida bo‘lib, qazish jarayoni, konni o‘zlashtirishning 5-navbati doirasida olib borilayotgan ishlar bilan yaqindan tanishdilar.

“Muruntov” koni geologlar tomonidan eng yirik oltin resurslariga ega kon sifatida eʼtirof etilib, uning resurslari 4,5 ming tonnadan ortiq baholangan. Oltin tarkibli maʼdanni qazib olish bo‘yicha dunyodagi eng yirik konlardan biri hisoblanadi. Ayni vaqtda konning uzunligi 5,5 kilometr, kengligi 3,4 kilometr, o‘rtacha chuqurligi 650 metrni tashkil etadi. Keyingi yillarda konni o‘zlashtirishning 5-navbati bo‘yicha amalga oshirilayotgan investitsion loyiha doirasida keng qo‘lamli ishlar olib borilmoqda. Xususan, “Komatsu”, “Caterpillar”, “Hitachi”, “Libherr” kabi yetakchi xorijiy kompaniyalar tomonidan ishlab chiqarilgan og‘ir yuk ko‘taruvchi avtoag‘dargichlar, gidravlik ekskavatorlar va boshqa kon texnikalari olib kelinib, konda ish unumdorligini oshirish, sarf-xarajatlarni qisqartirish imkonini bermoqda.

2-gidrometallurgiya zavodi kombinatning eng yirik va yetakchi korxonasi hisoblanadi. Mazkur zavodda tarkibida qimmatbaho metall bo‘lgan maʼdanni maydalashdan boshlab, undan tayyor mahsulot ajratib olib, oliy sifatli quyma oltin hosil qilishgacha bo‘lgan texnologik jarayonlar to‘liq amalga oshiriladi. 1969-yil 21-iyulda 2-GMZda “Muruntov” konida qazib olingan maʼdandan 11 kg. 820 gr. og‘irlikdagi birinchi oltin yombisi olindi. Bugungi kunda zavodda yiliga 50 mln tonnadan ortiq maʼdan qayta ishlanmoqda. Zavod zamonaviy axborot-kommunikatsiya texnologiyalari asosida to‘liq raqamlashtirilgan bo‘lib, korxonada ishlab chiqarishning raqamlashtirilgan boshqaruv markazi faoliyat ko‘rsatmoqda. 2-GMZda ishlab chiqarilayotgan kombinatning “999,9” soflikdagi oltin quymalari jahonning qimmatbaho metallar bo‘yicha birjalarida O‘zbekistonning brendiga aylandi. Joriy yilda korxona jamoasi zavod ishga tushurilganligining 55 yilligini nishonlamoqda.

Markaziy kon boshqarmasining Tashqi suv taʼminoti birlashgan energoxizmati ham 55 yilligini nishonlamoqda. 1969-yil 27-may kuni ushbu korxona tomonidan xizmat ko‘rsatiladigan “Amudaryo-Zarafshon” suv quvurining 1-yo‘nalishi foydalanishga topshirilgan edi. Bugungi kunda 1 ming kilometrga yaqin suv quvurlari orqali Amudaryo daryosidan Zarafshon va Uchquduq shaharlari, “Bessopan”, “Muruntov”, “Dovgiztov”, “Auminzo-Amantoy” sanoat maydonlaridagi ishlab chiqarish korxonalariga texnik va ichimlik suvi yetkazmoqda.

Shuningdek, OAV vakillari va jurnalistlar uchun 7-gidrometallurgiya zavodi majlislar zalida matbuot anjumani tashkil etildi.

Matbuot anjumanida mutaxassislar tomonidan taʼkidlanganidek, mazkur zavod zamonaviy texnologiyalar asosida texnogen, yaʼni, avval ishlangan chiqindilarni qayta ishlash bo‘yicha dunyodagi eng yirik korxonalardan biri hisoblanadi. Texnogen chiqindilarni qayta ishlashning muhim jihatlaridan biri, bu - maʼdanni qazib olish, texnologik maydalash, saralash va tashish uchun xarajatlarning yo‘qligidir. Bunday choralar zavodda ishlab chiqariladigan mahsulot tannarxini sezilarli darajada pasaytirishga olib keldi va yiliga 16 million tonna texnogen maʼdan qayta ishlanib, mahsulot olinmoqda.

Matbuot anjumanida OAV vakillari va jurnalistlar savollariga atroflicha javoblar berildi.

“NKMK” AJ Matbuot xizmati.