• Yaratildi: 24.05.2024
• Yangilandi: 24.05.2024
• O'qildi: 2080

Texnika va uskunalarning uzluksiz ishlashi taʼminlanmoqda

Navoiy kon-metallurgiya kombinati tizimida turlicha vazifalarni bajaradigan ko‘plab bo‘linmalar faoliyat yuritib kelayapti. Ular orasida kombinat boshqarmasining bosh mexanik bo‘limi korxonadagi ishlab chiqarish texnika va uskunalarining uzluksiz ishlashini taʼminlash kabi muhim yo‘nalishni muvofiqlashtiruvchi bo‘linma hisoblanadi.

Ayni paytda gidrometallurgiya zavodlaridagi qariyb 130 ta tegirmon, elektr toki va gidravlikada ishlaydigan 130 ta ekskavator, 102 ta burg‘ulash uskunasi, 116 ta shaxta avtoag‘dargichi, 5 ta maydalagich, tik-qiya konveyri, 38 kilometrlik davriy uzluksiz liniya va boshqa uskunalarning ish holatda bo‘lishi doimiy bo‘lim mutaxassislari nazoratida.  

Keyingi yillarda kombinat texnika parki zamonaviy kon texnikalari bilan yangilanmoqda. Bu borada AQShning “Caterpillar” kompaniyasi bilan shaxta avtoag‘dargichlar, yuklash va tashish texnikalari, Yaponiyaning “Komatsu”, “Hitachi” kompaniyalari bilan gidravlik ekskavatorlar, Shvetsiyaning “Boomer” kompaniyasi bilan shaxta burg‘ulash uskunalari, Rossiyaning “Ijora MZ” kompaniyasi bilan karyer zanjirli ekskavatorlari, Germaniyaning “Libherr” kompaniyasi bilan gidravlik ekskavatorlar, shuningdek, “Epiroc”, “Sandvik”, “IKO Machinery” va boshqa yetakchi kompaniyalar bilan hamkorlik o‘zining yaxshi natijalarini bermoqda.

Joriy yilda kovsh hajmi 22 kubometr (50 tonna) bo‘lgan 8 ta gidravlik ekskavator olib kelinishi rejalashtirilgan. Hozirga qadar 4 ta “Komatsu” va “Libherr” rusumli gidravlik ekskavator keltirildi. Bugungi kunda ekskavatorlarning 2 tasi Markaziy kon boshqarmasi Kon jihozlarini taʼmirlash sexida kombinat mutaxassislari tomonidan yig‘ilmoqda va ulardan kelgusida “Muruntov” konida foydalanish ko‘zda tutilgan. Shuningdek, kovsh hajmi 6 kubometr bo‘lgan 2 ta “Libherr” rusumli gidravlik ekskavatorni yig‘ish jarayoni olib borilmoqda. Bu texnikalar to‘liq yig‘ilgandan so‘ng “Sharqiy” konida ishlatilishi mo‘ljallangan.

Shu bilan birga, kombinat boshqarmasining bosh mexanik bo‘limi jamoasi bo‘linmalar mutaxassislari bilan birgalikda maxalliylashtirish dasturini amalga oshirishda ham faol ishtirok etib kelmoqda. Keyingi besh yilda ularning ishtirokida ehtiyot qismlar, nasoslar, nostandart uskunalar, metallokonstruksiyalar, sharli tegirmonlar, gidrotsiklon qurilmalar, texnologik qo‘yiltirgichlar, metal kesish dastgohlari, reduktorlar, burg‘ulash uskunalari, ekskavatorlarga kovshlar kabi 500 turdan ortiq mahsulot maxalliylashtirildi.  

“NKMK” AJ Matbuot xizmati.