• Yaratildi: 22.05.2024
• Yangilandi: 22.05.2024
• O'qildi: 2201

“NKMK” AJ delegatsiyasi O‘zbekistonda IPOga tayyorgarlik ko‘rish mavzusidagi seminarda ishtirok etdi

21-may kuni Toshkent shahrida “BeOne Uzbekistan” konsalting kompaniyasi tomonidan O‘zbekiston Respublikasi Istiqbolli loyihalar milliy agentligi bilan hamkorlikda tashkil etilgan “O‘zbekistonda IPO: tayyorgarlikning asosiy jihatlari. Tendensiya va imkoniyatlar” mavzusida amaliy seminar o‘tkazildi.

Mazkur seminarda davlat organlari, tadbirkorlik subyektlari, aksiyadorlik jamiyatlari, “Toshkent” Respublika fond birjasi vakillari ishtirok etishdi. Tadbirda bosh direktorning transformatsiya masalalari bo‘yicha birinchi o‘rinbosari Ye.Antonov, bosh direktorning iqtisod va moliya bo‘yicha o‘rinbosari J.Hasanovlar tarkibidagi “Navoiy kon-metallurgiya kombinati” AJ delegatsiyasi ham qatnashdi.

Seminarni o‘tkazishdan maqsad – aksiyadorlik jamiyatlarining IPOga tayyorgarlik ko‘rish bilan bog‘liq bosqichlar va talablar to‘g‘risida xabardorlik darajasini oshirish. Tadbirda O‘zbekiston kapital bozori, fond birjasidagi listing tartibi, emitentlar uchun soliq masalalari, shuningdek, aksiyadorlik jamiyatlarida korporativ boshqaruv sifatining muhim roli, IPO jarayoniga tayyorgarlik ko‘rishning dolzarb masalalari muhokama qilindi.

“BeOne Uzbekistan” kompaniyasi 2023-yilda O‘zbekistonda tashkil etilgan bo‘lib, texnologiya va biznes sohalari, bitimlar, soliq, huquq va tadbirkorlikni qo‘llab-quvvatlash yo‘nalishlarida konsalting xizmatlarini ko‘rsatishga ixtisoslashgan.

“NKMK” AJ Matbuot xizmati.