• Yaratildi: 21.05.2024
• Yangilandi: 21.05.2024
• O'qildi: 1500

Ilmiy hamkorlik

Navoiy kon-metallurgiya kombinati o‘z faoliyati yo‘nalishida xorijning yetakchi kompaniyalari, ilmiy muassasalari bilan hamkorlik ishlarini amalga oshirib kelmoqda. Bu borada Rossiyaning kon geomexanikasi va marksheyderlik ishi ilmiy-tadqiqot instituti – «ВНИМИ» tarmoqlararo ilmiy markazi bilan 2018-yildan yo‘lga qo‘yilgan hamkorlik o‘zining yaxshi natijalarini bermoqda.

Kuni kecha ushbu ilmiy muassasaning bosh direktori M.Shadrin boshchiligidagi delegatsiya vakillari kombinatga tashrif buyurdi. Bundan asosiy maqsad – kombinat va ilmiy muassasa o‘rtasida 2024-2025-yillarda amalga oshiriladigan istiqbolli ilmiy-tadqiqot loyihalarini ko‘rib chiqish, kadrlar malakasini oshirish va boshqa mavzulardagi masalalarni muhokama etishdan iborat.

- Kombinat mutaxassislari bilan bu galgi uchrashuv ham samarali kechdi. Qator loyihalarni muhokama etdik. Shu bilan birga, joriy yilning 27-31-may kunlari kombinatning 36 nafar mutaxassislari hamda Navoiy davlat konchilik va texnologiyalar universitetining 9 nafar professor-o‘qituvchilari uchun malaka oshirishga qaratilgan mashg‘ulotlarini o‘tkazishga kelishdik. Bu kabi amaliy ishlarimiz bilan kombinat bilan hamkorlik qilayotganimizdan mamnunmiz, - deydi «ВНИМИ» AJ Ural filiali direktori V.Venger.

Taʼkidlash kerakki, mashg‘ulotlarning ilk bosqichi shu yilning 22-26-yanvar kunlari Navoiy davlat konchilik va texnologiyalar universitetida “Yer osti kon ishlari geomexanikasi” mavzusida o‘tkazilgan bo‘lsa, avgust oyida “Ochiq kon ishlari geomexanikasi” mavzusida o‘tkazilishi rejalashtirilgan.

“NKMK” AJ Matbuot xizmati.