• Yaratildi: 18.05.2024
• Yangilandi: 18.05.2024
• O'qildi: 138

Navoiy kon-metallurgiya kombinati mehnat jamoasiga

Aziz do‘stlar!

Sizlarni sharafli kasb bayrami - O‘zbekiston Respublikasi konchilik va metallurgiya sanoati xodimlari kuni bilan chin qalbimdan samimiy tabriklayman.

Fidokorona va mashaqqatli mehnatlaringiz bilan qazib olinayotgan va milliy sanoatimizning haqiqiy faxri bo‘lgan Navoiy kon-metallurgiya kombinatida tayyorlanayotgan oltin qo‘ymalar bugun dunyo miqyosida yuksak eʼtirof etilib, Yangi O‘zbekiston iqtisodiyoti va taraqqiyotiga xizmat qilayotganini mamnuniyat bilan taʼkidlaymiz.

Bugungi quvonchli kunda korxona yutuqlari haqida gapirganda, O‘zbekiston Respublikasi Prezidenti hurmatli Shavkat Miromonovich Mirziyoyev tomonidan tasdiqlangan 2017-2026-yillarda kombinatni strategik rivojlantirish dasturi muhim ahamiyatga ega bo‘lganini aytib o‘tish o‘rinlidir.

Kombinat ahil jamoasining saʼy-harakatlari natijasida keyingi yillarda umumiy qiymati 2,9 mlrd AQSH dollari bo‘lgan 23 ta yirik investitsion loyiha amalga oshirilib, yangi gidrometallurgiya zavodlari, konlar va boshqa ishlab chiqarish tarmoqlari ishga tushirildi.

Qizilqum kengliklarida fidokorona mehnat qilayotgan konchi va metallurglar kombinatda shakllangan shonli mehnat anʼanalarini davom ettirib, zimmangizga olgan barcha vazifalarni sharaf bilan uddalashlaringizga, bor bilim va kuch-g‘ayratlaringizni yurtimiz iqtisodini rivojlantirish, korxonaning shuhratini yanada oshirishga to‘la safarbar etishlaringizga ishonamiz.

Siz, azizlarga, mustahkam sog‘lik, baxt-saodat, Yangi O‘zbekiston farovonligi yo‘lidagi bunyodkorona mehnatingizda yangi zafarlar tilayman.

Abdulla ARIPOV,

O‘zbekiston Respublikasi Bosh vaziri.