• Yaratildi: 16.05.2024
• Yangilandi: 16.05.2024
• O'qildi: 2146

Germaniya delegatsiyasi kombinatga tashrif buyurdi

14-may kuni Germaniyaning bir qator davlat idoralari va sanoat korxonalari vakillari “Navoiy kon-metallurgiya kombinati” AJ faoliyati bilan tanishish uchun kombinatga tashrif buyurdi.

Xorijiy delegatsiyaning tashrifidan ko‘zlangan maqsad – Germaniya korxonalari hamda mahalliy korxonalar o‘rtasida uzoq muddatli o‘zaro manfaatli aloqalarni o‘rnatishga qaratilgani bilan ahamiyatlidir.

Reynland-Pfals federal yerinig Iqtisodiyot, transport va qishloq xo‘jaligi vazirligi mutasaddilari boshchiligidagi delegatsiya Navoiy mashinasozlik zavodining yirik sexlarida bo‘ldi. Zavod direktori J.Hayitov ularni korxona ish jarayonlari va ishlab chiqarish quvvatlarini oshirish, tog‘-kon sanoatida foydalaniladigan turli butlovchi qismlar, texnologik uskunalar, tegirmonlarni mahalliylashtirish bo‘yicha olib borilayotgan amaliy ishlar bilan yaqindan tanishtirdi.

Shuningdek, Germaniya savdo-sanoati palatasi va nemis korxonalari vakillari tomonidan o‘z faoliyati to‘g‘risida batafsil maʼlumot berildi hamda ushbu korxona va tashkilotlar bilan istiqbolli hamkorlik yo‘nalishlari muhokama qilindi.

Xorijiy delegatsiyasi kombinatga amalga oshirgan tashrifidan katta taassurot olganligini bildirib, samimiy qabul va konstruktiv uchrashuv uchun minnatdorchilik bildirdi.

“NKMK” AJ Matbuot xizmati.