• Yaratildi: 08.05.2024
• Yangilandi: 08.05.2024
• O'qildi: 1453

Mehnat fronti qatnashchilari va kombinat faxriylari eʼzozda

O‘zbekiston Respublikasi Prezidentining joriy yilning 7-maydagi “Ikkinchi jahon urushi qatnashchilarini rag‘batlantirish to‘g‘risida”gi Farmoniga asosan Navoiy kon-metallurgiya kombinatida ham 9-may – Xotira va qadrlash kuni keng nishonlanmoqda.

Kombinat maʼmuriyati, kasaba uyushmasi Kengashi hamda konchilik va metallurgiya sanoati faxriylari Kengashi tomonidan umumxalq bayrami arafasida turli hududlarda istiqomat qilib kelayotgan 12 nafar mehnat fronti qatnashchilari hamda NKMK faxriylari xonadonlariga borib, ularni Xotira va qadrlash kuni hamda Ikkinchi Jahon urushida erishilgan g‘alabaning 79 yilligi bilan tabriklash, pul mukofotlari va sovg‘a-salomlar ulashish bo‘yicha amaliy ishlar qilindi.

Bayram arafasida kombinat vakillari Samarqand viloyati Nurobod tumani “Qilichli” qishlog‘ida yashovchi 96 yoshli otaxon Bozor bobo Normurodov, Zarafshon shahrida yashovchi 95 yoshli otaxon Fyodor Orishak va Navoiy shahrida yashovchi 94 yoshli onaxon Yelizaveta Bocharova va boshqa nuroniylar xonadonida bo‘lishdi.

Muloqot chog‘ida otaxon va onaxonlar urush davridagi qiyinchiliklar haqida so‘zlab, bugungi dorilomon kunlar, bebaho neʼmat bo‘lgan tinchlik qadriga yetish kerakligini, yurtimizda keksalarga bo‘lgan hurmat-eʼtibordan mamnunligini bildirdi.

- Davlatimiz rahbariyatidan minnatdormiz. Shu yurtda tug‘ilganimizga shukronalar aytamiz. Hech bir bayramda bizni eʼtiborsiz qoldirmaydi. Shu bilan birga, kombinat vakillari ham tez-tez kelib, holimizdan xabar olib turadi. O‘zlarining shirin so‘zi bilan biz, keksalarni ruhlantirib ketadi. Bugun ham bir guruh hamkasblarimiz bayram bilan tabriklagani kelgani umrimizga yana-da umr qo‘shdi, - deydi Navoiy shahrida yashovchi 88 yoshli otaxon Safar bobo Shukurov. -  Ilohim, yurtimiz tinch, Yurtboshimiz omon bo‘lsin! Inson qadri ulug‘langan Yangi O‘zbekistonimiz gullab-yashnayversin.

“NKMK” AJ Matbuot xizmati.