• Yaratildi: 04.04.2024
• Yangilandi: 04.04.2024
• O'qildi: 1341

NKMKning 2023-yil yakunlari bo‘yicha asosiy ko‘rsatkichlari

“Navoiy kon-metallurgiya kombinati” aksiyadorlik jamiyati O‘zbekiston sanoatining eng yirik korxonalaridan biri hisoblanadi.

Kombinatning mamlakatimiz iqtisodiyotidagi o‘rni va ahamiyatidan kelib chiqqan holda davlatimiz Rahbari va Hukumati tomonidan uning faoliyatini isloh qilish bo‘yicha qarorlar qabul qilingan. 2020-2022-yillarda kombinatda islohotlar o‘tkazilib, tubdan yangicha korporativ boshqaruv tizimi joriy qilindi, faoliyatni innovatsion rivojlantirishga qaratilgan chora-tadbirlar tasdiqlandi, xalqaro standartlar tamoyillariga o‘tish ishlari amalga oshirildi.

“Navoiy kon-metallurgiya kombinati” aksiyadorlik jamiyatining asosiy faoliyati qimmatbaho metallar ishlab chiqarish hisoblanadi. Mamlakat iqtisodiyotining bayroqdori sifatida kombinat tomonidan mahsulot ishlab chiqarish hajmi yil sayin barqaror o‘sib bormoqda.

“NKMK” AJ faoliyatining 2023-yil yakunlariga bag‘ishlangan matbuot anjumani 2024-yil 27-mart kuni ommaviy axborot vositalari ishtirokida o‘tkazildi. Matbuot anjumani o‘tkazilishi to‘g‘risida eʼlon (www.ngmk.uz/uz/home/pressa/1785-oav-vakillari-va-jurnalistlar-diqqatiga.html) va 2023-yil yakunlari bo‘yicha maʼlumotlar (https://www.ngmk.uz/uz/home/pressa/1790-nkmk-aj-faoliyatining-2023-yildagi-yakunlari-boyicha-matbuot-anjumani-otkazildi.html) ham kombinat rasmiy saytida eʼlon qilingan.

NKMK tomonidan 2023-yilda tog‘-jinslarini qazib olish hajmi 262 mln. kub metrni tashkil qilib, 2022-yilga nisbatan 5,6 foizga oshgan. Oltin tarkibli maʼdanlarni qayta ishlash hajmi 99,3 mln. tonnani tashkil qilib, o‘tgan yilga nisbatan o‘sish surʼati 2,6 foizga taʼminlandi.

Mahsulot ishlab chiqarish hajmi 2023-yilda 67,5 trln. so‘mni tashkil qilib, 2022-yilga nisbatan o‘sish surʼati 103,8 foizga teng bo‘ldi. Mazkur ko‘rsatkichlarning so‘nggi yildagi dinamikasini tahlil qilsak, 2016-yilga nisbatan tog‘-jinslarini qazib olish hajmi 2,5 barobar, maʼdanni qayta ishlash 1,6 barobar, oltin ishlab chiqarish hajmi 26 foizga, kumush – 47 foizga oshganligini ko‘rishimiz mumkin.

Jahonning boshqa oltin qazib oluvchi kompaniyalaridan farqli ravishda kombinat qidiruv-razvedka ishlaridan tortib to tayyor birja mahsulotlarini ishlab chiqarishgacha bo‘lgan uzluksiz jarayonni nazarda tutuvchi tugallangan ishlab chiqarish siklini amalga oshiruvchi sanoat klasteri hisoblanadi. Bu umumiy maqsadga erishish, ishlab chiqarishni yangi bosqichga olib chiqish va  faoliyat samaradorligini oshirish uchun o‘zaro manfaatdor bo‘linmalarni birlashtiradigan noyob klaster tizimining yorqin namunasidir.

Oltin ishlab chiqarish hajmini oshirishga qaratilgan chora-tadbirlar NKMKni jahonning oltin ishlab chiqaruvchi TOP-10 kompaniyalar safida yetakchi o‘rinlarga ko‘tardi va uni eng boy yer osti boyliklarini muvaffaqiyatli o‘zlashtirayotgan yuqori darajada rivojlangan sanoat majmuasi va eng yangi texnologiyalarga ega bo‘lgan kompaniyaga aylantirdi. Yangi ishlab chiqarish quvvatlarini foydalanishga topshirilishi samarasi o‘laroq, NKMK oltin ishlab chiqaruvchi kompaniyalar reytingida 2016-yildagi 7-o‘rindan 2023-yilda 4-o‘ringa ko‘tarildi.

“NKMK” AJ mamlakatimizning iqtisodiy va ijtimoiy rivojlanishiga o‘zining munosib hissasini qo‘shib bormoqda. Kombinatning moliyaviy natijalari yil sayin barqarorlashib bormoqda. 2022-yilda foyda solig‘i to‘lagunga qadar foyda summasi 26 trln. so‘mni tashkil qilgan bo‘lsa, 2023-yilda bu ko‘rsatkich 30 trln. so‘mga yoki 15,4 foizga oshgan.

Hozirgi kunda NKMK barqaror va jadal rivojlanayotgan kompaniya hisoblanadi. Faoliyat ko‘lami, davlat uchun daromadlilik darajasi, ishlab chiqarish quvvatlari hajmi, band bo‘lgan xodimlar soni bo‘yicha kombinat mamlakatimiz iqtisodiyotida yetakchi o‘rinni egallab, O‘zbekistonning ijtimoiy-iqtisodiy rivojlanishiga salmoqli hissa qo‘shib kelmoqda.

2023-yil yakuni bo‘yicha mamlakat yalpi ichki mahsuloti tarkibida NKMK ulushi 6,3 foizni tashkil etdi. Respublika sanoat mahsuloti hajmidagi ulushi 14 foizini tashkil qildi.

NKMK, shuningdek, mamlakatdagi eng yirik soliq to‘lovchilar ro‘yxatida birinchi o‘rinda turadi. Davlat byudjeti daromadlarini shakllantirishda kombinat tomonidan to‘lanadigan soliq va majburiy to‘lovlar salmoqli o‘rinni egallaydi va yil sayin oshib bormoqda. Jumladan, 2022-yilda byudjetga 33,4 trln.so‘m to‘lovlar amalga oshirilgan bo‘lsa 2023-yilda 38,6 trln. so‘mni (115,7%) tashkil qildi. Bu O‘zbekiston Respublikasi Davlat byudjeti daromadlarining 16,3 foizni tashkil etdi.

O‘zbekiston Respublikasi Prezidentining 2023-yil 24-martdagi “Iqtisodiyotda davlat ishtirokini qisqartirishning qo‘shimcha chora-tadbirlari to‘g‘risida”gi PQ-102 qarorida aksiya paketlari “bitta aksiya - bitta lot” tamoyili asosida mahalliy fond bozorida xalq IPOsini o‘tkazish, yaʼni aksiyalarni O‘zbekiston fuqarolariga sotish tartibi asosida ommaviy savdolar orqali xususiylashtiriladigan korxonalar ro‘yxati tasdiqlangan. Ushbu qaror ijrosini taʼminlash maqsadida “NKMK” AJning 2 foiz aksiyalari Davlat aktivlarini boshqarish bo‘yicha yagona siyosatni amalga oshiruvchi tashkilot - O‘zbekiston Respublikasi Davlat aktivlarini boshqarish agentligiga o‘tkazilgan.

Ayni paytda Navoiy kon-metallurgiya kombinatida transformatsiya jarayonlari ham jadal davom etmoqda, kombinatning 2023-2025-yillarga mo‘ljallangan transformatsiya dasturi tasdiqlandi. Bunda, xom-ashyo bazasini rivojlantirish, asosiy ishlab chiqarish samaradorligini oshirish, raqamlashtirish, investitsion jarayonlarni rivojlantirish, ESG va sanoat xavfsizligini taʼminlash va boshqa yo‘nalishlar alohida eʼtiborga olingan.

Bundan tashqari, kombinat balansidagi qimmatbaho metallar zaxiralarining 90 foizi Avstraliya JORC Code kodeksi standartlari talablari asosida qayta baholangan bo‘lib, joriy yil yakuni bu jarayon to‘liq yakuniga yetkazish maqsad qilingan.

Shuningdek, yetakchi konsalting kompaniyalar bilan hamkorlikni yo‘lga qo‘yish, korporativ boshqaruvning zamonaviy usullarini takomillashtirish borasida ham keng qamrovli ishlar olib borilmoqda. “Heidrick & Struggles” “xed-xanter” kompaniyasi bilan birgalikda faoliyat yo‘nalishlari bo‘yicha samaradorlikning muhim ko‘rsatkichlari (KPI) tizimi hamda ishlab chiqarish samaradorligini oshirish va mehnatga haq to‘lashning yangi tizimi joriy qilinadi.

“NKMK” AJ Matbuot xizmati.