• Yaratildi: 21.03.2024
• Yangilandi: 21.03.2024
• O'qildi: 2313

Navro‘z umumxalq bayrami keng nishonlandi

21-mart kuni Navoiy shahridagi “So‘g‘diyona” o‘yingohida “Navoiy kon-metallurgiya kombinati” aksiyadorlik jamiyati, “NKMK jamg‘armasi” davlat muassasasi, “Navoiyran” davlat korxonasi ishchi-xodimlari va ularning oila aʼzolari uchun "Olam nurga to‘lsin sen bilan, Navro‘z!" shiori ostida Navro‘z umumxalq bayramiga bag‘ishlangan “Navro‘z sayli” o‘tkazildi.

Bayram tadbiri erta tongdan karnay-surnay va musiqa sadolari ostida barchani “So‘g‘diyona” o‘yingohi maydoniga chorladi.

Uchta korxona va ularning bo‘linmalari tomonidan tashkil etilgan rang-barang anʼanaviy ko‘rgazmalar namoyishi, ayyom taomlari bezangan dasturxonlar, aviashou va varrak uchirish musobaqasi, sport musobaqalari, milliy sanʼat va hunarmandchilikning namunalari, “Farhod” madaniyat saroyi ijodiy jamoalari chiqishlari, xalq o‘yinlari barcha ishtirokchilar, turli millat va elat vakillari, mehmonlarga bayramona zavq bag‘ishladi.

“Sug‘diyona” o‘yingohining maydoni varrak uchirish ishtiyoqmandlariga to‘ldi. Bu manzilga kelgan ota-onalar, mehmonlar, maktab o‘quvchilari, yoshlar, bolajonlar o‘ziga xos bayram shousidan cheksiz bahramand bo‘ldilar. 

“NKMK” AJ Matbuot xizmati.