• Yaratildi: 22.02.2024
• Yangilandi: 22.02.2024
• O'qildi: 3804

“Eng yaxshi ratsionalizatorlik taklifi” tanlovi g‘oliblari taqdirlandi

22-fevral kuni Navoiy shahridagi “NKMK tarixi” muzeyida “Navoiy kon-metallurgiya kombinati” AJ yosh ishchi-xodimlari o‘rtasida 2023-yilda o‘tkazilgan “Eng yaxshi ratsionalizatorlik taklifi” tanlovi g‘oliblarini taqdirlash tadbiri o‘tkazildi.

Tadbirda “NKMK” AJ bosh muhandisi maslahatchisi N.Snitka, NKMK xodimlari kasaba uyushmalari Kengashi raisi o‘rinbosari O.Temirov, Yangi texnologiyalarni joriy etish bo‘yicha innovatsion markaz boshlig‘i Q.G‘ofurovlar so‘zga chiqib, tanlov g‘oliblarini samimiy tabrikladilar hamda kombinat tomonidan mazkur yo‘nalishda olib borilayotgan ishlar va kelajakdagi rejalar haqida o‘zlarining fikr-mulohazalarini bildirdilar.

“Eng yaxshi ratsionalizatorlik taklifi” tanlovi komissiyasiga 270 nafar ishtirokchidan 274 ta ratsionalizatorlik taklifi kelib tushdi. Tanlov komissiyasi tomonidan ular orasidan 8 ta yo‘nalish bo‘yicha eng munosib topilgan g‘oliblar aniqlandi.

Jumladan, quyidagilar eng yaxshi ratsionalizatorlik takliflari sohiblari, deb topildi:

- “Geologiya” yo‘nalishi bo‘yicha Markaziy kon boshqarmasi “Muruntov” koni Gamma-aktivlashtirilgan tahlil markaziy laboratoriyasi boshlig‘i Alisher Qo‘ldoshov, Janubiy kon boshqarmasi bosh geologi Alisher Gizzatov, Janubiy kon boshqarmasi “Zarmitan” koni bosh geologi Akmal Eshqulov;

- “Konchilik ishi” yo‘nalishi bo‘yicha “Qizilqum” kon boshqarmasi “Qoraqo‘ton” koni ishlab chiqarish texnik guruhi muhandisi Aziz Jiyanov;

- “Oltin ajratib olish texnologiyasi” yo‘nalishi bo‘yicha Markaziy kon boshqarmasi 2-gidrometallurgiya zavodi direktori Hamid Kenjayev;

- “Mexanika” yo‘nalishi bo‘yicha Markaziy kon boshqarmasi 7-gidrometallurgiya zavodi bosh mexanigi Nodirbek Tajidinov;

- “Energetika” yo‘nalishi bo‘yicha Markaziy kon boshqarmasi “Muruntov” koni bosh energetigi Azizjon Rashidov;

- “Transport” yo‘nalishi bo‘yicha Markaziy kon boshqarmasi Temir yo‘l transporti boshqarmasi muhandis-konstruktori Uchqun Boynazarov;

- “Ishlab chiqarishni avtomatlashtirish” yo‘nalishi bo‘yicha Markaziy kon boshqarmasi Avtomobil transporti boshqarmasi chilangari Yorqin Ahmedov;

- “Axborot-kommunikatsiya texnologiyalar” yo‘nalishi bo‘yicha “Uchquduq” Axborot-kommunikatsiya texnologiyalar markazi muhandis-dasturchisi Jamshid Ravshanov.

Tanlov g‘oliblari diplom va pul mukofotlari bilan taqdirlandi.

“NKMK” AJ Matbuot xizmati.