• Yaratildi: 07.02.2024
• Yangilandi: 07.02.2024
• O'qildi: 2537

Korxona mineral xomashyo bazasini mustahkamlash yo‘lida

“Navoiy kon-metallurgiya kombinati” AJda geologiya sohasi muhim ahamiyatga ega bo‘lib, kombinat geologlari tomonidan korxona mineral xomashyo bazasini yanada mustahkamlash, oltin maʼdan zaxiralarini kengaytirish bo‘ycha keng ko‘lamli ishlar amalga oshirilmoqda.

Birgina 2023-yilda “Boylik”, “Umid”, “Vodiy”, “Bessopantov”, “Yangi Dovon”, “Pistali”, “O‘rtaliq” va boshqa oltin konlari gorizontlarida gidrometallurgiya zavodlarining mineral xomashyo bazasi uchun maʼdan zaxirasini 74 mln tonnaga oshirishga erishildi. Amaldagi 61 ta kon gorizontlarida oltin maʼdan zaxiralari mavjudligi aniqlanib, bu resurslarni kelgusida qo‘shimcha manba sifatida o‘zlashtirish mo‘ljallanmoqda.

Kombinat geologiya sohasida bunday natijalar raqamlashtirish evaziga erishilmoqda. Xususan, geologik maʼlumotlar raqamlashtirilgan holda qayta ishlanmoqda va bunda dunyoning rivojlangan mamlakatlarida qo‘llanilayotgan geoinformatsion texnologiyalardan, dasturiy taʼminotlardan keng foydalanilmoqda.

Taʼkidlash kerakki, kombinatdagi geologiya-qidiruv ishlari “NKMK” AJ Resurslar departamenti, Geologiya-qidiruv ekspeditsiyasi hamda “O‘zbekgeologiya qidiruv” AJ geologlari hamkorligida olib borilmoqda.

“NKMK” AJ Matbuot xizmati.