• Yaratildi: 06.02.2024
• Yangilandi: 06.02.2024
• O'qildi: 2357

Laboratoriyada 2 millionta geologik namuna tahlil qilindi  

Navoiy kon-metallurgiya kombinatida konlardan qazib olinadigan maʼdan tarkibidagi qimmatbaho metallarni tezkorlik bilan aniqlashda “Muruntov” koni Gamma-aktivlashtirilgan tahlil markaziy laboratoriyasi alohida o‘rin egallaydi.

Bugungi kunda mazkur laboratoriyada 17 soniya davomida maʼdandagi oltin tarkibini aniqlash imkoniyati mavjud bo‘lib, bir sutkada 4,3 mingdan ortiq geologik namuna tahlil qilinmoqda.

Keyingi yillarda laboratoriyada ishlab chiqarish quvvatini oshirish maqsadida asbob-uskunalarni modernizatsiya qilish ishlari amalga oshirildi. Buning natijasida ish surʼati va tahlil darjasi oshdi. Jumladan, 2021-yilda 1,5 million namunada tahlil o‘tkazilgan bo‘lsa, 2023-yilda bu ko‘rsatkich 2 milliontani tashkil etdi. Joriy yilda esa namunalar tahlilini 2,5 milliontaga yetkazish rejalashtirilgan.   

Taʼkidlash kerakki, mazkur laboratoriya nafaqat kombinat bo‘linmalari, balki “O‘zbekgeologiya” AJga qarashli geologik-qidiruv ekspeditsiyalari uchun ham geologik namunalarni tahlil qilib berayapti.

“NKMK” AJ Matbuot xizmati.