• Yaratildi: 01.02.2024
• Yangilandi: 01.02.2024
• O'qildi: 2088

Kitobxonlik madaniyatini rivojlantirish yo‘lida

Bugungi kunda mamlakatimizda kitobxonlik madaniyatini rivojlantirish va qo‘llab-quvvatlashni yangi bosqichga olib chiqish bo‘yicha ijobiy ishlar olib borilmoqda. Navoiy kon-metallurgiya kombinati jamoasi ham bu jarayonda faol ishtirok etib kelmoqda.

Kombinat tomonidan har yili ko‘plab asarlar, to‘plamlar yaratilmoqda. NKMK tarixi, sohaga oid asarlarni tarjima qilish, kitoblarni muassasalarga beg‘araz ulashish korxonada an’anaga aylanib borayapti.

Keyingi yillarda kombinat tashabbusi bilan turli tillarda 40 dan ortiq ilmiy-texnikaviy, badiiy, tarixga oid kitoblar, o‘quv qo‘llanmalar, tarjima asarlar, kitob-albomlar nashr etildi. Jumladan, “Buyuk ixtirolarning sehrli olami”, “O‘zbekistonda kon-metallurgiya tarixi”, “Vaqt – umuminsoniy qadriyat”, “Yangi istiqbollar sari”, “Kosmoplanetar olam va yer jarayonlari haqida”, “Yangilanayotgan O‘zbekiston: Navoiy kon-metallurgiya kombinatining yangi tarixi”, “Metall va menerallarning shifobaxsh xususiyatlari”, “История горной металлургии Узбекистана”, “История создания и развития урановой отрасли Узбекистана”, “Справочник вредные вещества их классификaция и общие требования безопасности” va boshqa asarlar ilm-fan fidoiylarining ijod namunalaridir. Bu asarlar keng jamoatchilik, kitobxonlar ommasi tomonidan yuksak baholanib, katta ahamiyatga ega ekanligi e’tirof etilmoqda.

Shuni alohida taʼkidlab o‘tish joizki, O‘zbekiston Yozuvchilar uyushmasi bilan birgalikda nashrga tayyorlangan va kombinat homiyligida chop etilgan “Zomin ilhomlari”, “Kengliklar sururi”, “Uyg‘oq xotiralar” to‘plamlari taniqli yozuvchi va shoirlar bilan birga, kon-metallurgiya sohasida mehnat qilayotgan havaskorlar ijodini o‘zida jamlagan.

Bu ishlarning ortida katta zahmat, mehnat yotganligini har qanday zukko o‘quvchi yaxshi biladi. Chunki bu kabi kitoblar odamlarni faqat yaxshilikka yetaklaydi, bilimini oshirishga xizmat qiladi.

“NKMK” AJ Matbuot xizmati.