• Yaratildi: 26.01.2024
• Yangilandi: 26.01.2024
• O'qildi: 3008

2023-yil sarhisobi: raqamlashtirish

Bugungi kunda kombinat transformatsiyasining ustuvor yo‘nalishlaridan biri korxonaning ishlab chiqarish va boshqaruv jarayonlariga raqamlashtirishni keng joriy etishdir.

Oxirgi uch yilda “NKMK” AJ Axborot-kommunikatsiya texnologiyalari boshqarmasi mutaxassislari tomonidan 200 ga yaqin ishlab chiqarish va boshqaruv vazifalarini bajaradigan 20 dan ortiq axborot tizimlari ishlab chiqildi. Raqamli transformatsiya dasturi doirasida 2021-2023-yillarda korxonaning ishlab chiqarish va boshqaruv jarayonlariga raqamli texnologiyalarni joriy etish bo‘yicha 40 dan ortiq chora-tadbirlar amalga oshirildi.

Jumladan, 2023-yilda Markaziy kon boshqarmasida ishlab chiqarishning raqamlashtirilgan yagona boshqaruv markazi ishga tushirildi. 2-gidrometallurgiya zavodida joylashgan mazkur markazning asosiy vazifasi geologik-qidiruv ishlari, maʼdanni qazib olish, tashish va gidrometallurgiya zavodlarida qayta ishlash jarayonlarini to‘liq kuzatib borish, tahlil qilish va boshqarishdan iboratdir. 

Bu borada olib borilgan ishlar natijasida “NKMK” AJ o‘tgan yilda Toshkent shahrida raqamli texnologiyalar sohasida o‘tkazilgan Markaziy Osiyodagi eng katta tadbirlardan biri – “ICTWeek Uzbekistan - 2023” AKT haftaligida 95,2 ball bilan birinchi o‘ringa muvofiq ko‘rilib, “Raqamli texnologiyalarni joriy etish bo‘yicha eng yaxshi xo‘jalik organi” sifatida taqdirlandi.

Davlat organlari va tashkilotlarida 2022-yilda shaffoflik ko‘rsatkichlari bo‘yicha amalga oshirilgan tadbirlarning natijadorligini baholashga qaratilgan “Ochiqlik indeksi”da kombinat 76,2 ball bilan yuqori pog‘onalardan birini, aksiyadorlik jamiyatlari kesimida esa 22 ta yirik sanoat korxonalari va kompaniyalari orasida 1-o‘rinni egalladi.

Korxonada raqamlashtirilgan texnologiyalarning ish jarayonlariga joriy etilishi ishchi-xodimlar faoliyatini yengillashtirish, quvvatlarni iqtisod qilishga xizmat qilmoqda.

“NKMK” AJ Matbuot xizmati.