• Yaratildi: 15.01.2024
• Yangilandi: 15.01.2024
• O'qildi: 2452

O‘zbekistonda uran sanoatining tashkil etilishi va rivojlanishi tarixi

Navoiy kon-metallurgiya kombinati tomonidan konchilik sohasiga oid ilmiy va ilmiy-ommabop adabiyotlar chop etib kelinmoqda. Xususan, kombinatning 65 yilligiga bag‘ishlangan akademik B.Yo‘ldoshev tahriri ostida korxona mutaxassislarining “O‘zbekistonda uran sanoatining tashkil etilishi va rivojlanishi tarixi” (“История создания и развития урановой отрасли Узбекистана”) nomli kitobi nashr etildi.

Ushbu kitobda uran elementining kashf etilishi va atom energetikasi paydo bo‘lishi, O‘zbekiston uran sanoatining ilmiy-ishlab chiqarish bazasining yaratilishi, uran konlari va yadro fizikasi tarixi ko‘plab adabiy materiallar va arxiv hujjatlari tahlili asosida keltirilgan bo‘lib, ularning aksariyati birinchi marta nashr etildi. Shuningdek, kitobda uran qazib olish texnologiyasining rivojlanishi, rahbarlar, mutaxassislar va xodimlarning tarjimai holi ham tavsiflangan.

Mazkur kitobda Navoiy kon-metallurgiya kombinati shakllanishi va rivojlanishining tarixi, boshqaruvning yangi shakllarini bosqichma-bosqich joriy etish, kombinatning xorijiy korxonalar bilan aloqalari, “Navoiyuran” davlat korxonasining tashkil etilishi hamda keyingi yillarda bu sohada amalga oshirilayotgan ishlar keng yoritilgan.  

“NKMK” AJ Matbuot xizmati.