• Yaratildi: 08.01.2024
• Yangilandi: 08.01.2024
• O'qildi: 2879

2023-yil sarhisobi: “yashil energetika” yo‘nalishidagi ishlar

“Navoiy kon-metallurgiya kombinati” AJda qayta tiklanuvchi quvvat manbalaridan olinadigan elektr energiyasi hajmi yildan-yilga ortib bormoqda. “Yashil energetika” texnologiyalari kombinat uchun muhim ahamiyat kasb etib, korxonalarda amaldagi energiya manbalariga qo‘shimcha quvvat ishlab chiqarishni taʼminlaydi. 

Xususan, 2023-yilda kombinatda energiya samaradorligini taʼminlash bo‘yicha amalga oshirilgan chora-tadbirlar natijasida 54,7 mln kW.h. elektr energiyasi hamda 1,2 mln kubmetr tabiiy gaz tejaldi. 

Alohida taʼkidlash joizki, kombinatda quyosh fotoelektr stansiyalarini joriy etish bo‘yicha keng qamrovli ishlar olib borilmoqda. O‘tgan yilda kombinatda jami 1 450 kW. quvvatli quyosh fotoelektr stansiyalari ishga tushirilib, ular tomonidan yiliga 2,465 mln kW.h. elektr energiyasi ishlab chiqarilmoqda. Joriy yilda talab etiladigan elektr energiyasini quyosh energiyasi manbalaridan qoplash bo‘yicha kombinat bo‘linmalarida 5 700 kW. quvvatli quyosh fotoelektr stansiyalari o‘rnatiladi. Natijada kombinat bo‘linmalaridagi maʼmuriy binolarinig elektr energiyaga bo‘lgan ehtiyojining 50 foizidan ortig‘i qayta tiklanuvchi energiya manbalari hisobidan qoplanadi.

Bugungi kunda investitsiya loyihasi asosida NKMK bo‘linmalarining sanoat obyektlari – “Auminzo-Amantoy” koni va 5-gidrometallurgiya zavodi yaqinida 220 MW. quvvatli quyosh fotoelektr stansiyasini qurish bo‘yicha ishlar olib borilmoqda. Ushbu fotoelektr stansiyasi ishga tushirilgach, yiliga 374 mln kW.h. elektr energiyasi ishlab chiqarish imkoniyati yaratiladi.   

Bundan tashqari, kombinat korxonalarini issiq suv bilan taʼminlash uchun quyosh suv isitish qurilmalarini (geliokollektorlar) o‘rnatish ishlari amalga oshirilmoqda. Geliokollektorlarning asosiy butlovchi qismlari ishlab chiqarilishini mahalliylashtirish evaziga ularning tannarxini 50 foizgacha arzonlashtirishga erishildi.

2023-yilda kombinatdagi mavjud quyosh suv isitish qurilmalarining umumiy soni qariyb 5 000 donaga yetkazildi. Natijada kombinat obyektlarining aprel-oktyabr oylarida issiq suvga bo‘lgan ehtiyoji 100 foiz geliokollektorlar hisobidan qoplanmoqda.

“NKMK” AJ Matbuot xizmati.