• Yaratildi: 06.01.2024
• Yangilandi: 06.01.2024
• O'qildi: 3325

2023-yil sarhisobi: Mahalliylashtirish dasturi ijrosi

Mamlakatimizda mahalliylashtirilgan mahsulotlarni ishlab chiqarish, tarmoqlararo sanoat kooperatsiya aloqalarini yana-da kengaytirish iqtisodiyotning muhim yo‘nalishlaridan biri hisoblanadi. “Navoiy kon-metallurgiya kombinati” AJ mazkur yo‘nalish bo‘yicha yetakchi sanoat korxonasi hisoblanadi. Korxonada bu borada qabul qilingan dastur ijrosi bo‘yicha tizimli ishlar olib borilmoqda.

2023-yilda kombinatda Mahalliylashtirish dasturi doirasida 629,5  mlrd so‘mlik 173 ta loyiha bo‘yicha mahsulot ishlab chiqarildi. Xususan, Nurota tumanidagi “Pistali” koni negizida barpo etilgan 6-gidrometallurgiya zavodi uchun yangi turdagi sharli tegirmon, masofada boshqariladigan avtomatlashtirish tizimlari asosida ishlovchi pultlar, boshqaruv shkafi, yangi turdagi shaxta burg‘ilash texnikasi ehtiyot qismlari kabi yuqori qiymatli mahsulotlar ishlab chiqarilishi kombinat mutaxassislari tomonidan o‘zlashtirildi.

Kombinat tajribasi sifatida ishlab chiqaruvchilarni qo‘llab-quvvatlash maqsadida “shatakka olish” mexanizmi joriy etilgani respublikada katta eʼtiroflarga sazovor bo‘lib kelayapti. Buning natijasida mahalliy ishlab chiqaruvchilar bilan kooperatsiya aloqalari yildan-yilga kengayib bormoqda.  Jumladan, o‘tgan yilda tarmoqlararo sanoat kooperatsiyasi doirasida mahalliy korxonalardan 5,5 trln so‘mlik mahsulot xarid qilindi.  

Misol uchun, Toshkent shahridagi “Chilon Lubricants” MChJ korxonasida texnik moylar va reagentlar, Navoiy viloyatida joylashgan “Navpromlitmash”da oraliq filtr-groxot, po‘lat quymalar, kon-shaxta jixozlari, “Gidro Stanko Servis” MChJda vibratsion g‘alvirlarni, “GAUCH” korxonasida poliuretan mahsulotlarni, “Azia Gormash” MChJ QKda sharoshkali uskunalarni, “Latem-Metal”, “Xomashyo sifat servis”, “Navoiyskiy Elektrodniy Zavod” MChJ kabi tadbirkorlik subyektlari bilan grafitlangan elektrod, maxsus chuyandan quyma mahsulotlar, ehtiyot va butlovchi qismlarni ishlab chiqarish bo‘yicha yo‘lga qo‘yilgan hamkorlik yaxshi natijalarni bermoqda.

Bugungi kunda Navoiy kon-metallurgiya kombinatida  mahalliylashtirilgan mahsulotlar ishlab chiqarishda Navoiy mashinasozlik zavodi alohida ahamiyatga ega. Hozirda mazkur zavodda 15 ming turdan ortiq mahalliylashtirilgan mahsulotlar ishlab chiqarilmoqda va uning 97 foizi NKMK ehtiyoji uchun yo‘naltirilmoqda.

 “NKMK” AJ Matbuot xizmati.