• Yaratildi: 05.01.2024
• Yangilandi: 05.01.2024
• O'qildi: 3078

2023-yil sarhisobi: kadrlarni tayyorlash va malakasini oshirish

“Navoiy kon-metallurgiya kombinati” AJda kadrlarni tayyorlash, o‘qitish, qayta tayyorlash va malakasini oshirish ishlari tizimli yo‘lga qo‘yilgan. Xususan, Navoiy, Zarafshon, Uchquduq, Nurobod shaharlari, Zarkent qo‘rg‘onida kombinatning yuqori malakali kadrlar tayyorlashga ixtisoslashgan 5 ta o‘quv markazi faoliyat ko‘rsatadi.

Bugungi kunda kombinatda 47,5 ming nafardan ortiq ishchi-xodim mehnat qilmoqda. Undan 12,3 ming nafarini yoshlar, 11,8 ming nafari oliy maʼlumotli xodimlar, 6,2 ming nafarini xotin-qizlar tashkil etadi.

2023-yilda kadrlar malakasini oshirish va qayta tayyorlash maqsadida 15 ming 48 nafar ishchi-xodim o‘qitildi. Shundan kombinat o‘quv markazlarida 5 ming 305 nafar turli kasb egalari qayta tayyorlandi, 6 ming 902 nafari esa malaka oshirdi. Shu bilan birga 2 ming 841 nafar rahbar va muhandis texnik xodimlar sohasi bo‘yicha respublika oliy o‘quv yurtlari, mamlakatimiz va xorijiy malaka oshirish markazlarida malakasini oshirdi.

Aholini kasb-hunarga o‘qitishning yangi tizimini tashkil etish, o‘rta bo‘g‘in mutaxassislarini tayyorlash maqsadida “NKMK” AJ ko‘magida Navoiy shahrida “Ishga marhamat” monomarkazi faoliyati yo‘lga qo‘yildi. 2023-yilda ushbu monomarkazda taʼlim olgan tinglovchilarning 448 nafari mutaxassisligi bo‘yicha kombinat bo‘linmalarida amaliyot o‘tab, ishga qabul qilindi.

Kombinat o‘quv markazlarining moddiy-texnik bazasi mustahkamlanayapti. So‘nggi yillarda o‘quv markazlari zamonaviy asbob-uskunalar va o‘quv jihozlari bilan taʼminlandi.

Korxonadada muhandis kadrlar tayyorlash borasida olib borilayotgan ishlar ishchi-xodimlar – kombinatning asosiy boyligi ekanligining isbotidir.  

“NKMK” AJ Matbuot xizmati.