• Yaratildi: 25.12.2023
• Yangilandi: 25.12.2023
• O'qildi: 3125

“NKMK” AJ Boshqaruv kengashining yig‘ilishi o‘tkazildi

Kombinat boshqarmasida “NKMK” AJ Boshqaruv kengashining Transformatsiya dasturi tadbirlarini amalga oshirishga jalb etilgan Boston Consulting Group (BCG) xalqaro konsalting kompaniyasi vakillari faoliyatining oraliq yakunlariga bag‘ishlangan yig‘ilishi bo‘lib o‘tdi.

Yig‘ilishda kombinat rahbarlari va BCG kompaniyasi vakillari ishtirok etishdi. Tadbirda Transformatsiya va raqamlashtirish boshqarmasi mutaxassislarining “NKMK” AJ Transformatsiya dasturining asosiy yo‘nalishlari va kelgusida amalga oshirish uchun taklif etilayotgan loyihalar ro‘yxati bo‘yicha hisoboti tinglandi.

Yuqorida qayd etilgan dasturning samarali amalga oshirilishini taʼminlash, shuningdek, mutaxassislarning hisobotlarini tinglash va muhokama qilish asnosida Boshqaruv kengashi tomonidan korxonaning sohaviy mutaxassislarini jalb etgan holda amalga oshirish taklif etilgan loyihalarni batafsil ishlab chiqish va rejalashtirilgan ishlarni bajarish yuzasidan qaror qabul qilindi.

Boshqaruv kengashi – “NKMK” AJ transformatsiyasi maqsadi va vazifalarini belgilash, strategiyasini shakllantirish va tasdiqlash hamda uning doirasidagi loyihalarni amalga oshirish, shuningdek, transformatsiya ishlari natijalarini baholash va qabul qilishga masʼul bo‘lgan maxsus tashkil etilgan organ.

 Boston Consulting Group (BCG) – boshqaruv konsaltingiga ixtisoslashtirilgan xalqaro kompaniya.

“NKMK” AJ Matbuot xizmati.