• Yaratildi: 21.09.2023
• Yangilandi: 21.09.2023
• O'qildi: 3838

“KDB Bank Uzbekistan” banki vakillari bilan uchrashuv o‘tkazildi

21-sentabr kuni “NKMK” AJ boshqarmasida kombinat rahbariyati va “KDB Bank Uzbekistan” banki vakillari uchrashuvi bo‘lib o‘tdi.

  

Uchrashuv doirasida ikki tomonlama muzokaralar bo‘lib o‘tdi. Muzokaralarda o‘zaro hamkorlikni yo‘lga qo‘yish, jumladan “NKMK” AJning investitsiya loyihalarini bank tomonidan moliyalashtirish masalalari muhokama qilindi. Muloqot davomida kombinat vakillari bugungi kunda korxona faoliyatida amalga oshirilayotgan transformatsiya va ishlab chiqarishni raqamlashtirish bo‘yicha loyihalar haqida so‘zlab berdi.  

Muzokara natijalariga ko‘ra, “KDB Bank Uzbekistan” vakillari “NKMK” AJ bilan hamkorlik qilishdan manfaatdor ekanligini bildirib, kombinatning moliyaviy ehtiyojlari uchun ilk 17,5 mln AQSH dollariga teng 2 yil muddatli qayta tiklanuvchi (revolver) kredit liniyasini taqdim qilishga tayorligini bildirdi.   

Shuningdek, Navoiy kon-metallurgiya kombinati tarixi bilan yaqindan tanishish maqsadida xorijiy bank vakilari Navoiy shahridagi “NKMK tarixi” muzeyiga tashrif buyurdilar. Muzeyda ular eksponatlar, tarixiy artefaktlar, noyob tabiiy qazilmalarga boy Qizilqum zaminining qadimiy tarixi va buguni hamda kombinatning gidrometallurgiya zavodlari “Muruntov” koni, konchilik texnikalari maketlari bilan tanishdilar.

 

 

Maʼlumot uchun, “KDB Bank Uzbekistan” banki 1997-yilda tashkil topgan bo‘lib, Janubiy Koreyaning “KDB Bank” (Koreya Taraqqiyot Banki)ning bank xizmatlarini taklif etuvchi O‘zbekistondagi eng yirik xalqaro bankdir. Bank faoliyati biznesni rivojlantiriish uchun korporativ va investitsion xizmatlarni ko‘rsatishga qaratilgan.

“NKMK” AJ Matbuot xizmati.