• Yaratildi: 06.09.2023
• Yangilandi: 07.09.2023
• O'qildi: 4778

Ixtisoslashtirilgan maktab-internati foydalanishga topshirildi

IJTIMOIY MASʼULIYAT

2023-yil 6-sentabr kuni Tomdi tumanida Navoiy kon-metallurgiya kombinati tomonidan barpo etilgan zamonaviy 504 o‘rinli  ixtisoslashtirilgan maktab-internatini foydalanishga topshirishga bag‘ishlangan tantanali tadbir bo‘lib o‘tdi.

Tadbirda Navoiy viloyati hokimi N.Tursunov, “NKMK” AJ Boshqaruvi raisi – Bosh direktori Q.Sanaqulov, Ixtisoslashtirilgan taʼlim muassasalari agentligi direktori A.Ubbiyev, nuroniylar, keng jamoatchilik va ommaviy axborot vositalari vakillari ishtirok etishdi.

Keyingi yillarda mamlakatimizda O‘zbekiston Respublikasi Prezidenti Shavkat Mirziyoyev tashabbusi bilan “Yangi O‘zbekiston – maktab ostonasidan boshlanadi”, degan ezgu g‘oya asosida taʼlim sohasida keng ko‘lamli islohotlar olib borilayotgani alohida taʼkidlandi. Yurtimizda yuzlab zamonaviy bilim dargohlari barpo etilib, Prezident, ijod va ixtisoslashtirilgan maktablar ochildi. Eng muhimi, o‘qituvchi va murabbiylarning mehnat sharoitlarini yaxshilash, malakasi va ish haqlarini oshirish, taʼlim tizimida darsliklarni isloh qiilish, o‘qitishning zamonaviy uslublarini joriy etishga katta eʼtibor qaratilmoqda.

Navoiy kon-metallurgiya kombinati ijtimoiy masʼuliyatni zimmasiga olib, Qizilqum hududi infratuzilmasini rivojlantirishda faol qatnashib kelayapti. Bunday xayrli ishlarni davom ettirish 2022-2026-yillarga mo‘ljallangan Yangi O‘zbekistonning taraqqiyot strategiyasini “Insonga eʼtibor va sifatli taʼlim yili”da “NKMK” AJda amalga oshirishga oid chora-tadbirlar dasturida ham o‘z ifodasini topgan.

 Mazkur dasturga muvofiq Tomdi tumanida kombinat tomonidan zamonaviy 504 o‘rinli ixtisoslashtirilgan maktab-internati qurib bitkazildi. Ushbu ixtisoslashtirilgan maktab-internati yettita blok va uch qavatdan iborat bo‘lib, o‘quvchilar taʼlim olishi uchun barcha sharoitlar yaratilgan. Taʼlim muassasasi zamonaviy o‘quv xonalari va kompyuter jihozlari bilan taʼminlangan. Maktabda har bir fan uchun maxsus o‘quv sharoitlari yaratilgan bo‘lib, sinfxonalari eng zamonaviy texnologiyalar bilan jihozlangan.

Bu taʼlim dargohiga Zarafshon shahri, Tomdi, Uchquduq tumanlari va Navoiy shahridan 5-11 sinfgacha bo‘lgan eng bilimli, yuqori intellektual salohiyatga ega 288 nafar o‘g‘il-qiz sinovlardan muvaffaqiyatli o‘tib, o‘qishga qabul qilindi. Yangi taʼlim muassasasida ishlash uchun 30 nafar malakali o‘qituvchilar uch bosqichli tanlov asosida ishga qabul qilindi.

Taʼkidlash kerakki, ushbu taʼlim muassasasi kelajak avlod vakillarining bilimli voyaga yetishiga xizmat qiladi. Bu, kombinatning mamlakatimizda taʼlimni qo‘llab-quvvatlash, yoshlar yaxshi bilim olishiga sharoit yaratish, hududlarni ijtimoiy-iqtisodiy rivojlantirish yo‘lidagi faol ishtirokidan dalolatdir.

“NKMK” AJ Matbuot xizmati.