• Yaratildi: 03.08.2023
• Yangilandi: 03.08.2023
• O'qildi: 2802

Kombinat temiryo‘lchilari faoliyatiga bir nazar

O‘zbekiston Respublikasi temir yo‘l transporti xodimlari kuniga

Kombinatda ishlab chiqarish surʼatini oshirish, kon va shaxtalardan maʼdanlarni gidrometallurgiya zavodlariga yetkazish va boshqa muhim vazifalarni amalga oshirishda temiryo‘lchilarning hissasi  beqiyosdir. Bu soha ulkan korxona faoliyatida alohida o‘rin egallaydi. Keyingi yillarida olib borilgan saʼy-harakatlar natijasida temir yo‘l zamonaviy sohaga aylandi. Bayram arafasida “NKMK” AJ Temir yo‘l transporti bo‘limi boshlig‘i vazifasini bajaruvchi Zafar Sayemov quyidagilarni so‘zlab berdi:

Keyingi yillarda davlatimiz rahbarining temir yo‘l sohasini isloh qilish va rivojlantirishga bo‘lgan katta eʼtibori natijasida yuksak marralarga erishilmoqda. Sohaning zamonaviy industriyasi barpo etilib, yangi liniyalar, bekatlar qurilmoqda. Tezyurar poyezdlar qatnovi yo‘lga qo‘yilib, yuk va yo‘lovchi tashish sifati tubdan yaxshilanmoqda. Bu kabi o‘zgarishlarni hozirda ikki ming nafarga yaqin soha xodimlari mehnat qilayotgan Navoiy kon-metallurgiya kombinati temir yo‘l tarmog‘i misolida ham yaqqol ko‘rish mumkin.

Shuni alohida taʼkidlash joizki, bugungi kunda kombinatda maʼdan tashish hajmining 60 foizdan ko‘prog‘i aynan shu sohaga to‘g‘ri keladi va bu albatta, eʼtirofga arzigulik natijadir. Ayni paytda korxona balansidagi 376 kilometrdan ortiq temir yo‘llar orqali 54 ta teplovoz va 816 ta vagonlarda bir yilda 57,4 million tonnadan ortiq maʼdan gidrometallurgiya zavodlariga yetkazib berilmoqda. Yangi liniyalar qurish, temir yo‘l parkini yangilash hisobiga bu ko‘rsatkich yildan-yilga o‘sib bormoqda. Vaholanki, bu 2016-yilda boru yo‘g‘i 40,7 million tonnani tashkil etardi! Bunda, yarim asrdan ko‘p tarixga ega Markaziy kon boshqarmasida Temir yo‘l transporti boshqarmasi, Shimoliy va “1-GMZ” kon boshqarmalari tarkibidagi Temir yo‘l transporti sexlari alohida o‘rin tutadi.

Maʼlumki, har bir soha taraqqiyoti eʼtiborga, qo‘llab-quvvatlashga bog‘liq. Biz mehnat qilayotgan kombinatda barcha sohalar kabi temir yo‘l tarmog‘i ham jadal rivoj topib bormoqda. Bundan ruhlangan soha fidoiylari o‘zlarining yangi tarixini yaratmoqda. Keyingi yillarda amalga oshirilgan ulkan ishlar bunga yaqqol misoldir. Jumladan, 2021-2023-yillarda kombinat tarixida ilk bor jamoa kuchi bilan “Turbay”, “Balpantov” va “Tomdibuloq” konlarini gidrometallurgiya zavodlari bilan bog‘lovchi 82,6 kilometrlik yangi temir yo‘l liniyalari, “2TE25KM” rusumli 10 ta ikki seksiyali teplovozlar olib kelingani faoliyatimizda ilgari kuzatilmagan katta yangilik bo‘ldi. Zamonaviy rusumdagi bunday teplovozlarni respublikamizda birinchi bo‘lib kombinat olib keldi. Albatta, olib borilayotgan keng ko‘lamli islohotlar, qurilish-bunyodkorlik ishlaridan ko‘zlangan pirovard maqsad ham shu – har bir sohani yangi bosqichga olib chiqishdir.

Sohamizning yana bir yutug‘i, bu – kadrlar masalasidir. Chunki, kombinatda temir yo‘lchilarning yosh mutaxassislarni tarbiyalash, sohaning oltin fondini yaratish yutuqlar asosining omilidir. 2021-2022-yillarda 46 nafar oliy, 224 nafar o‘rta maxsus maʼlumotli yoshlar ishga olingani, ular “ustoz va shogird” anʼanasiga ko‘ra tajribali mutaxassislarga biriktirilgani fikrimiz tasdig‘idir. Chunki, qimmatbaho tosh ham qanchalik ishlov berilsa, shuncha yaltirayveradi.

Tabiati injiq, yozi jaziramali, qishi izg‘irinli Qizilqum kengliklarida ko‘pming kishilik jamoa bilan kecha-yu kunduz mehnat qilish oson emas. Hamkasblarimiz bu borada o‘zlarini har tomonlama namoyon etib, sharafli burchini, o‘zlariga bildirilgan yuksak ishonchni, zimmasiga olgan ulkan masʼuliyatni sobitqadamlik bilan bajarib kelishayapti. Buning uchun har doim ular mehnati o‘z rag‘batini topib, temiryo‘lchilarni ijtimoiy himoya qilish, munosib ish sharoitlarini yaratishga ham birinchi darajali vazifa sifatida qarab kelinmoqda. Ish joylari bosqichma-bosqich sovutgich, konditsioner, mikroto‘lqinli pech, suv isitgich, oshxona jihozlari bilan taʼminlanayotgani buning isbotidir.

Hamkasblarimiz o‘zlarining amaliy ishlari bilan har yili O‘zbekiston Respublikasi Temir yo‘l transporti xodimlari kuni bayramini yorug‘ yuz, eʼtirofli yutuqlari bilan kutib olishlari anʼanaga aylangan. Joriy yilda ham temir yo‘lchilar vaʼdasiga amal qilib, rejalarni ortig‘i bilan bajargan holda kasb bayramini ko‘tarinki kayfiyatda kutib olmoqda. Shu yilning o‘tgan yetti oyida 30,4 million tonna maʼdanni gidrometallurgiya zavodlariga yetkazib berib, rejani 105,1 foizga uddalashdi. Bu marra o‘tgan yilning mos davriga nisbatan 3,8 million tonna ko‘p demakdir. Ular kombinat rivojiga o‘z hissalarini qo‘shayotganliklaridan mamnun.

Muxtasar aytganda, temir yo‘l tarmog‘ida ishlash sohaning oltin sahifasini yaratayotgan hamkasblarimiz uchun katta baxt, sharaf va masʼuliyatdir. Bundan hamisha faxrlanib, butun kuch-g‘ayratini korxona ravnaqiga safarbar etishda davom etaveradi.

“NKMK” AJ Matbuot xizmati.