• Yaratildi: 26.07.2023
• Yangilandi: 26.07.2023
• O'qildi: 4984

“NKMK" AJ faoliyatining 2023-yil I yarim yillikdagi yakunlari bo‘yicha matbuot anjumani o‘tkazildi

PRESS-RELIZ

2023-yil 26-iyul kuni “NKMK” AJning matbuot anjumanlarini o‘tkazish zalida “Navoiy kon-metallurgiya kombinati” aksiyadorlik jamiyati faoliyatining  2023-yil I yarim yillikdagi yakunlari bo‘yicha ommaviy axborot vositalari vakillari va jurnalistlar uchun matbuot anjumani o‘tkazildi.

Matbuot anjumanida bosh direktorning iqtisod va moliya bo‘yicha o‘rinbosari Shuhrat Aminov, Byudjetlashtirish va kontrolling bo‘limi boshlig‘i Umidjon Kostayev, Jamoatchilik bilan aloqalar bo‘yicha direktor Xolmamat Raupov, OAV vakillari va jurnalistlar ishtirok etishdi.      

“Navoiy kon-metallurgiya kombinati” AJ respublikamizning eng yirik sanoat korxonasi bo‘lib, zamonaviy konchilik asbob-uskunalari va texnologiyalar bilan jihozlangan, malakali muhandis, mutaxassis kadrlarga ega. Korxonaning ko‘pming kishilik jamoasi shu yilning birinchi yarim yilligida ham belgilangan rejalarni ortig‘i bilan bajarishga erishdi. Xususan, o‘tgan yarim yillikda kombinatda 31,5 trln so‘mdan ortiq sanoat mahsulotlari ishlab chiqarildi.

Hisobot davrida oltin ishlab chiqarish bo‘yicha prognoz ko‘rsatkichi to‘liq bajarilib, o‘tgan yilning shu davriga nisbatan 102,1 foizni tashkil etdi.

Bugungi kunda kombinat mamlakatimizdagi eng yirik soliq to‘lovchi hisoblanadi. Birgina, shu yilning o‘tgan yanvar-iyun oylarida 14,1 trln so‘mlik byudjetga to‘lovlar amalga oshirilib, prognoz ko‘rsatkich 104 foizga bajarildi.

Kombinat faoliyatida Investitsion dastur alohida o‘rin tutadi. Buning hisobiga ko‘plab yangi loyihalar ishga tushirilmoqda. O‘tgan olti oyda ushbu dasturga kirgan loyihalar bo‘yicha 255 mln dollarlik mablag‘ o‘zlashtirilib, 868 ta yangi ish o‘rinlari yaratildi.

Korxonada yildan-yilga mahalliylashtirish dasturi ham bajarilayapti. Jumladan, mazkur dasturdagi 154 ta loyiha doirasida 324 mlrd so‘mlik mahsulot ishlab chiqarildi va tarmoqlararo sanoat kooperatsiyasi doirasida 2,5 trln so‘mdan ortiq mahsulot xarid qilindi.

Xarajatlarni maqbullashtirish bo‘yicha kompleks chora-tadbirlar ijrosi mahsulot tannarxini 594,2 mlrd so‘mga kamaytirish imkonini berdi.

Matbuot anjumanida OAV vakillari va jurnalistlarning savollariga atroflicha javoblar berildi.

“NKMK” AJ matbuot xizmati.