• Yaratildi: 23.06.2023
• Yangilandi: 23.06.2023
• O'qildi: 1789

Maʼdan namunalari identifikatsiyalashtirildi

Bugun kon-metallurgiya sanoatida fan-texnika sohasidagi eng ilg‘or ishlanmalarni amaliyotga joriy etish muhim vazifalardan biri sanaladi. Negaki, ishlab chiqarish ko‘rsatkichlariga ijobiy taʼsir ko‘rsatadigan har bir ilmiy-texnikaviy tadqiqot ishi korxonaning barqaror rivojlanishga kafolat bo‘lib xizmat qilayapti.

“Navoiy kon-metallurgiya kombinati” aksiyadorlik jamiyatida maʼdan tarkibidagi qimmatbaho metallarni aniqlashda “Muruntov” koni Gamma-aktivlashtirilgan tahlil markaziy laboratoriyasi o‘ta muhim bo‘linmalar sirasiga kiradi. Uning noyobligi, elektronlarni chiziqli tezlatgichda tormozlangan gamma nurlari orqali laboratoriya tahlil ishlari olib borilishidadir.

Keyingi yillarda laboratoriyada qator o‘zgarishlar ro‘y berdi, zamonaviy jihozlar o‘rnatildi. Jumladan, yil boshida tezkor maʼlumotni olish bo‘yicha tahlil uchun qo‘llaniladigan konteynerlar, yaʼni namunalar solingan idishlarni identifikatsiyalash ishlari yakuniga yetkazildi. Har bir idishga tushirilgan QR kod orqali maʼdan namunalari bo‘yicha yig‘ilgan maʼlumotlar soniyalarda elektron shaklda geologlarga yetkaziladi.

So‘nggi yillarda laboratoriyada olib borilayotgan tahlillarning yillik ko‘rsatkichi 1 million 800 mingtagacha namunani tashkil etar edi. Joriy yilda laboratoriyada amalga oshirilgan modernizatsiya ishlari natijasida bu ko‘rsatkich ikki millionga yetkazish ko‘zda tutilgan. Bu esa mazkur laboratoriyada amalga oshirilayotgan tahlillar hajmi bo‘yicha yetakchi o‘rinda ekanligining yaqqol isbotidir.

“NKMK” AJ Axborot xizmati.