• Yaratildi: 24.05.2023
• Yangilandi: 24.05.2023
• O'qildi: 2733

Geologiya xizmati kengaymoqda

Bugungi kunda Navoiy kon-metallurgiya kombinatida oltin tarkibli maʼdanlar konlarini zamonaviy uslublar, texnika va texnologiyalarni qo‘llagan holda izlab topish ishlari amalga oshirilmoqda.

Hususan, geologlar tomonidan “NKMK” AJ Shimoliy kon boshqarmasi “Sharqiy” konida yer sathidan 500 metrgacha chuqurlikdagi foydali qazilma tomirlari to‘la o‘rganilgan. “Sharqiy” va “Dovg‘iztov” konlarida sulfidli maʼdanlarni qazib olish jadallashganligi bois qazib olinayotgan sulfidli maʼdanlarni navlarga ajratib olish anchagina qiyinchilik tug‘dirayotgan edi.

Geologlar bu borada Shimoliy kon boshqarmasi Axborot kommunikatsiya texnologiyalar markazi mutaxassislari bilan birgalikda yangi elektron dastur ishlab chiqishdi. Bu, Markaziy kon boshqarmasining Markaziy gamma-aktivlashtirilgan tahlil laboratoriyasidan o‘tkazilgan har bir namunaning tahlil natijalarini o‘z vaqtida olishga imkon yaratdi.

Shuningdek, hozirda “Sharqiy” va “Dovg‘istov” konlarida dunyo standartiga javob beradigan, O‘zbekistonda yagona bo‘lgan maʼdanni nazorat qilish stansiyasi ishga tushirildi. Ushbu stansiya geologlar tomonidan maʼdanni sifatli ajratib olishga xizmat qiladi.

“NKMK” AJ Matbuot xizmati.