• Yaratildi: 18.05.2023
• Yangilandi: 18.05.2023
• O'qildi: 3588

Ohaktosh qazib olish majmuasi ishga tushirildi

Navoiy kon-metallurgiya kombinatida gidrometallurgiya zavodlarida qo‘llaniladigan texnologik jarayonlarda maʼdan tarkibidagi oltinni ajratib olishda ohakdan keng foydalaniladi.

Kombinat geologlari tomonidan olib borilgan qidiruv ishlari natijasida “Muruntov” oltin konining sharqiy qismida ohaktosh koni aniqlandi. Ushbu kon zahiralarini o‘zlashtirish gidrometallurgiya zavodlarining ohakga bo‘lgan ehtiyojini qondirish imkonini beradi. Shu maqsadda 2 ta maydalab saralash majmuasini qurish mo‘ljallangan. Mazkur loyiha doirasida ohaktoshni tashish uchun 2,5 kilometrlik temir yo‘l liniyasi qurildi. Shuningdek, 1-maydalab saralash majmuasining qurilish-montaj va sozlash ishlari yakunlandi. 

O‘zbekiston Respublikasi konchilik va metallurgiya sanoati xodimlari kuni arafasida “Muruntov” ohaktosh konida mazkur bu obyekt foydalanishga topshirildi. Tadbirda “NKMK” AJ rahbariyati va Markaziy kon boshqarmasi mutaxassislari ishtirok etdi.

Mazkur loyiha to‘liq ishga tushgach kondan yiliga 490 ming kubometr ohaktosh qazib olinadi. Kelajakda konning uzunligi 980 metr, kengligi 530 metr va chuqurligi 90 metrni tashkil qiladi. Konda ohaktosh qazib olish ishlarida ekskavator, og‘ir yuk ko‘taruvchi avtoag‘dargich, burg‘ilash uskunasi va boshqa turdagi zamonaviy konchilik texnikalaridan foydalaniladi.

Taʼkidlash kerakki, mazkur loyihaning amalga oshirilishi kombinat gidrometallurgiya zavodlarini ohak bilan taʼminlashga xizmat qiladi.

 “NKMK” AJ Matbuot xizmati.