• Yaratildi: 02.05.2023
• Yangilandi: 02.05.2023
• O'qildi: 3186

Zarafshonda ixtisoslashtirilgan maktab-internati barpo etilmoqda

Navoiy kon-metallurgiya kombinati ijtimoiy masʼuliyatni zimmasiga olib, Qizilqum hududidagi Zarafshon vohasining infratuzilmasini rivojlantirishda ham faol qatnashib kelayapti.

Jumladan, so‘nggi yillarda Zarafshon shahrida kombinat mablag‘lari hisobidan favvoralar saylgohi, imkoniyati cheklangan bolalar uchun zamonaviy maktabgacha taʼlim tashkiloti va boshqa ijtimoiy obyektlar barpo etildi. Bunday xayrli ishlarni davom ettirish 2022-2026 yillarga mo‘ljallangan Yangi O‘zbekistonning taraqqiyot strategiyasini “Insonga eʼtibor va sifatli taʼlim yili”da “NKMK” AJda amalga oshirishga oid chora-tadbirlar dasturida ham o‘z ifodasini topgan.

Bugungi kunda mazkur dasturga muvofiq konchilar shahri Zarafshonda kombinat tomonidan 504 o‘rinli ixtisoslashtirilgan maktab-internatini qurish ishlari amalga oshirilmoqda.

Yetti blokdan iborat uch qavatlik o‘quv binosi qurilishi, shuningdek, 10 ta kottejni yotoqxona sifatida qayta taʼmirlash, sport maydonchalari barpo etish ishlariga Zarafshon qurilish boshqarmasining 140 nafardan ortiq quruvchilari, 10 dan ortiq maxsus texnikalar jalb etilgan.

Yangi o‘quv yilida foydalanishga topshirilishi rejalashtirilgan ushbu taʼlim muassasasi kelajak avlod vakillarining bilimli voyaga yetishiga xizmat qiladi. Bu, kombinatning mamlakatimizda taʼlimni qo‘llab-quvvatlash, yoshlar yaxshi bilim olishiga sharoit yaratish, hududlarni ijtimoiy-iqtisodiy rivojlantirish yo‘lidagi faol ishtirokidan dalolatdir.

“NKMK” AJ Matbuot markazi.