• Yaratildi: 17.04.2023
• Yangilandi: 17.04.2023
• O'qildi: 3276

Kadrlar tayyorlashda innovatsion yondashuv qo‘llanilmoqda

Navoiy kon-metallurgiya kombinatida inson hayoti, sog‘ligi bilan bog‘liq bo‘lgan mehnat muhofazasi va xavfsizlik texnikasini taʼminlash muhim ahamiyat kasb etadi. 

“NKMK” AJning Zarafshon shahridagi O‘quv markazida mehnat muhofazasi va xavfsizlik texnikasi yo‘nalishi bo‘yicha “Innovatsion texnologiyalar va zamonaviy taʼlim jarayoni” mavzusida taqdimot bo‘lib o‘tdi. Tadbirda Marakaziy kon boshqarmasi mutaxassislari, o‘quv ishlab chiqarish taʼlimi ustalari ishtirok etishdi.

Taqdimotda mehnat muhofazasi va xavfsizlik texnikasiga oid innovatsion texnologiyalarning ishlab chiqarishga to‘g‘ri va samarali joriy etilishi kadrlar salohiyatiga bog‘liqligi, kadrlar tayyorlashda esa pedagogik texnologiyalar muhim ahamiyatga ega ekanligiga alohida eʼtibor qaratildi.  

Tadbirda O‘quv markazi direktori O.Haydarov so‘zga chiqib, markazda mehnat muhofazasi va xavfsizlik texnikasi bo‘yicha kadrlarni tayyorlash jarayonida innovatsion texnologiyalar asosida taʼlim tizimini tashkil etish yo‘lga qo‘yilganini qayd etdi.

Jumladan, joriy yil boshida O‘quv markaziga 1 ta videomonitor, 4 ta ko‘p funksiyali interfaol doska  va birinchi tibbiy yordam ko‘rsatish uchun elektron tizimga ega manekenlar keltirildi. Yil oxiriga qadar yana 16 ta interfaol doskalar keltirilishi mo‘ljallangan.

Bundan asosiy maqsad ishchi-xodimlarning mehnat muhofazasi va xavfsizlik texnikasiga oid bilimlarini oshirib borish, ishlab chiqarishda yuzaga kelishi mumkin bo‘lgan baxtsiz hodisalar oldini olishga qaratilgan.

“NKMK” AJ Matbuot xizmati.