• Yaratildi: 30.03.2023
• Yangilandi: 04.04.2023
• O'qildi: 3688

“NKMK” AJ 2022-yil yakunlari bo‘yicha “Ochiqlik indeksi”da yuqori ko‘rsatkichni qayd etdi

O‘zbekiston Respublikasi Korrupsiyaga qarshi kurashish agentligi matbuot xizmatining xabariga ko‘ra, 29-mart kuni agentliqda davlat organlari va tashkilotlarida 2022-yilda ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan “Ochiqlik indeksi” natijalari eʼlon qilindi.

Xabarda keltirilganidek, “Ochiqlik indeksi” 84 ta baholash mezonidan tarkib topgan 8 ta indikator asosida baholandi. Samaradorlik ko‘rsatkichlarida 71 balldan 100 ballgacha to‘plaganlar – “yashil”, 55 balldan 71 ballgacha bo‘lganlar – “sariq” va 55 balldan past ko‘rsatkich qayd etganlar – “qizil” toifalarga kiritildi. Baholashda umumiy 86 ta, jumladan 21 ta vazirlik, 14 ta mahalliy davlat hokimiyati organlari, 32 ta davlat ishtirokidagi tashkilotlar hamda 19 ta qo‘mita va agentliklar qamrab olingan.

“Ochiqlik indeksi”ning yakuniy natijalariga ko‘ra, “Navoiy kon-metallurgiya kombinati” aksiyadorlik jamiyati 76,2 ball bilan eng yuqori samaradorlik ko‘rsatkichlaridan birini qayd etib, mazkur indeksning 5-pog‘onasini qo‘lga kiritdi. “Ochiqlik indeksi” quyidagicha:

Mazkur indeksning aksiyadorlik jamiyatlari kesimida esa Navoiy kon-metallurgiya kombinati 22 ta yirik sanoat korxonalari hamda kompaniyalar orasida 1-o‘rinni egalladi.  

Shuni alohida taʼkidlash joizki, O‘zbekiston Respublikasi Prezidentining 2022-yil 14-iyundagi “Davlat organlari va tashkilotlari faoliyatining ochiqlik darajasini oshirish va baholash tizimini joriy etish chora-tadbirlari to‘g‘risida”gi Farmoniga muvofiq, kombinat faoliyatida ochiqlik va shaffoflik, axborot olish erkinligini taʼminlash borasida tizimli ishlar amalga oshirilmoqda. Jumladan, “NKMK” AJning www.ngmk.uz rasmiy veb-saytining alohida “Ochiq maʼlumotlar” bo‘limida 8 ta yo‘nalish bo‘yicha ochiq maʼlumotlar joylashtirilib borilmoqda.   

“Navoiy kon-metallurgiya kombinati” aksiyadorlik jamiyatining 2022-yil yakunlari bo‘yicha “Ochiqlik indeksi”da yuqori samaradorlik ko‘rsatkichlariga ega bo‘lib, eʼtirofga munosib topilganligi korxona faoliyatida ochiqliq va shaffoflikni taʼminlashga ahamiyat berilayotganligining tasdig‘idir.

“NKMK” AJ Matbuot xizmati.