• Yaratildi: 27.03.2023
• Yangilandi: 27.03.2023
• O'qildi: 6013

“Pistali” koni: 1 mln kubometr tog‘ jinslari qazib olindi

Navoiy kon-metallurgiya kombinati tomonidan Nurota tumanidagi “Pistali” koni negizida yiliga 4 mln tonna oltin maʼdanini qayta ishlaydigan 6-gidrometallurgiya zavodi qurilishi jadal surʼatda olib borilmoqda.

2023-yil 6-yanvar kuni konda oltin maʼdan tanalarini ochish uchun ilk portlatish ishlari bajarilgandi. Umumiy qiymati 274,7 mln dollarlik mazkur loyihaning ro‘yobga chiqarilishi qimmatbaho metal ishlab chiqarish hajmini oshirishdan tashqari ikki mingdan ortiq yangi ish o‘rinlari yaratish imkonini beradi.

Ayni vaqtda kon majmuasining mustahkam moddiy-texnika bazasi yaratilmoqda. Jumladan, unda 2 ta zamonaviy burg‘ilash uskunasi, 3 ta ekskavator, 16 ta avtoag‘dargich, 3 ta maʼdan yuklagich va boshqa turdagi kon texnikalari mavjud.

27-mart kuni “Pistali” koni tarixida tarixiy kun sifatida muhrlanib qoladi yaʼni oltin maʼdan tanalarini ochish maqsadida kondan qazib chiqarilgan tog‘ jinslari hajmi 1 mln kubometrni tashkil etdi. Ayni kunlarda “Pistali” konida qariyb 360 nafar ishchi-xizmatchi, muhandis-texnik xodim faoliyat ko‘rsatayapti. Majmua tarkibidagi 6-gidrometallurgiya zavodi, kon uskunalarini taʼmirlash sexi, avtosaroy, ishchilar shaharchasi va boshqa obyektlar qurilishi jadal surʼatlarda olib borilmoqda.

Yiliga 4 mln tonna oltin tarkibli maʼdanlarni qayta ishlash quvvatiga ega 6-gidrometallurgiya zavodining ishga tushirilishi mamlakatimiz iqtisodini rivojlantirishga xizmat qiladi.

Norbo‘ta TOSHBATIROV,

 “1-GMZ” kon boshqarmasi direktori.